________________
१६२
सिरिअणंतजिणचरियं
नवपउमरायमाणिक्क-मयसिलाकुट्टिमम्मि रइयम्मि । रिउअमरेहिं मुक्का, दसद्धवन्ना कुसुमवुट्ठी ॥ २०४७ ॥ वेमाणिएहिं जणिओ, पायारो पंचवन्नरयणेहिं । दिसिपसरियकर-मणिमय-कविसीसय-सेणि-कमणीओ ॥ २०४८ ॥ तयणु कओ जोइसिएहिं, तलतवणीयमणहरो सालो । सिय-पीय-नील-सामल-सोणमणी-जणिय-कविसीसो ॥ २०४९ ॥ भवणवईहिं विरईओ, पायारो नहपहो व्व तारसिओ । घणमाणिक्कविणिम्मियकविसीसयमंडलीकलिओ ॥ २०५० ॥ पत्तेयं पायारे पोलिचउक्कं कयं रयणजणियं ।। मंदानिलचलचंदणमालाझणहणिरकिंकणियं ॥ २०५१ ॥ दो पासगयट्ठियकणय-कमलमुहपिहियहेमकलसदुगं । विप्फुरियकिरणमणिजणियतोरणस्सेणिससिरीयं ॥ २०५२ ॥ नवजोव्वणरमणीरूवरम्ममणिसालिहंजियाजुत्तं । खंभट्ठियकंचणघडिडज्झिरकप्पूरगंधड्ढं ॥ २०५३ ॥ पडिनेत्तमेहडंबरविलसिरउल्लोयलंबिहारलयं । अनिलचलिरद्धयालंबचिंधसियछत्त-चमरचयं ॥ २०५४ ॥ (कुलय) कलहोयप्पायारहवारदेसेसु सत्थसलिलाओ । पुक्खरणीओ कयाओ मणितोरणकमलकलियाओ ॥ २०५५ ॥ पुव्वुत्तरदिसीभाए मणिकंचणसालअंतरालम्मि । पहुवीसामत्थं देवच्छंदओ विरईओ रम्मो ॥ २०५६ ॥ जोयणपमाणमणिसालमज्झभायम्मि मणिमयं पीढं । चउदिसि मणिसीहासणपयवीढजुयं विणिम्मवियं ॥ २०५७ ॥ चेईयतरुछत्तत्तयसीहासणचमरदेवच्छंदाइं । सव्वं पि सामिभत्ता वंतरदेवा विउव्वंति ॥ २०५८ ॥ विप्फुरियरयणकिरणप्पसरावहरिया निसा तिमिरहरणा । कयतिहुयणजससरणा इय संजायए समोसरणे ॥ २०५९ ॥
Jain Education International
For Private & Personal Use Only
www.jainelibrary.org
