________________
१६१
अणंतजिणसमवसरणवण्णणं एवं उग्गविहारं काउं, वरिसतिगं भुवणनाहो । पुणरवि अउज्झनयरी, सहसंबवणे वणे पत्तो ॥ २०३५ ॥ तं मज्झे अस्सत्थस्स हेट्ठओ महिठियस्स वि दुमस्स । निस्सेसजीवसुहओ, ठिओ पहू काउसग्गम्मि ॥ २०३६ ॥ वइसाहा सियचउदिसि, तिहीए छठे तवे परिणमंतो । रेवइनक्खत्तम्मि संकंते रोहिणीरमणे ॥ २०३७ ॥ आरूढो सज्झाणे सामी तम्मि विसुज्झमाणम्मि । अणुसमयं पि हु उरलाई कुणइ घणघाइकम्माइं ॥ २०३८ ॥ दुद्धोदहिम्मि अमयुग्गरो इव धम्मज्झाणमज्झम्मि । सुक्कज्झाणुल्लासा जायंति खणे खणे पहुणो ॥ २०३९ ॥ केवल-रवि-अरुणोदय-कप्पो परमावही समुप्पन्नो । जेण पहू अवलोयइ, असंखजोयणमलोयं पि ॥ २०४० ॥ तो सुक्कज्झाणहुयासडड्ढघणघाइकम्ममलपडलं 1 पयडीहूयं कणयं, व सामिणो केवलं नाणं ॥ २०४१ ॥ संजाए जगगुरुणो, लोयालोयप्पयासए नाणे । समकालं पि हु सीहासणाई चलियाई इंदाण ॥ २०४२ ॥ तो ओहिनाणजाणियजिणनाणुप्पत्तिसमयकायव्वा । बत्तीस वि अमरिंदा, समागया मणिविमाणेहिं ॥ २०४३ ॥ पणमिय भत्तिभरेण य, सिरकमला सामिसालकम-कमलं । पारद्धा विरएउं, भत्तीए ते समोसरणं ॥ २०४४ ॥ तहाहि - संवट्टगवाएणं, वाउकुमारेहिं जोयणपमाणं । हरिय-तण-कयवराइसुइ-कक्करियरयं कयं खित्तं ॥ २०४५ ॥ तो मेहकुमारेहिं रइडं, गयणम्मि अब्भवद्दलयं । मयणाहि-घुसिण-चंदण-घणसारजलेण तं सित्तं ॥ २०४६ ॥
Jain Education International
For Private & Personal Use Only
www.jainelibrary.org
