________________
१५३
अणंतजिणदिक्खावण्णणं तो ओहिनाणजाणिय-जिणिंददिक्खामहा महाइंदा । कुंडल-किरीड-केउर-कडय-कंकण-कयाभरणा ॥ १९३२ ॥ सुरतरुमंजरिसेहरवणमालालंकिया चलिरचमरा । रणज्झणिरकिंकिणीगणविमाणविंदं समारूढा ॥ १९३३ ॥ वज्जंत-दुंदुहिरवाउरियगयणंगणा समणुपत्ता । बत्तीस वि सुरवइणो, भवणम्मि भुवणनाहस्स ॥ १९३४ ॥ तो तेहि जलहि-दह-नइ-जलाई गिरि-सिरि-तडाण मट्टीओ । कुसुम-जलरुह-कसाया आणीया पहुसिणाणत्थं ॥ १९३५ ॥ पुव्वाभिमुहं उववेसिऊण, सीहासणे भुवणनाहं । अहिसिंचंति सुरिंदा, सुरगिरिसिहरे व्व भत्तीए ॥ १९३६ ॥ परिवज्जिरेसु सुरदुंदुहीसु, जिणगुणगणम्मि गिज्जंते । निव्वत्तिओऽहिसेओ, पहुणो नच्चंतअमरीसु ॥ १९३७ ।। तो गंधकसाईए, लूहित्तु जलाविलं तणुं पहुणो ।। गोसीसचंदणेणं, सव्वंगं पि हु विलिंपंति ॥ १९३८ ॥ तयणु तियसेहि सामी, रयणाभरणेहिं फुरियकिरणेहिं । समलंकरिओ परिहाविओ य देवंगवत्थाई ॥ १९३९ ॥ तो सक्कसमाएसा, पालयनामामरेण निम्मविया ।। माणिक्कमया सिबिया, सागरदत्त त्ति नामेण ॥ १९४० ॥ पवणुल्लसंतधयरणज्झणंतकिंकिणिकलावकमणीया ।। खलहलिरघरघरावलिविमिस्सचउघंटटंकारा || १९४१ ॥ उल्लोयलंबिमुत्ताहलावलीविफुरंतकंतिभरो ।। केवलनाणालोय व्व सामिणो आगओ जीए ॥ १९४२ ॥ कणयघडिडज्झिरागरुधूमो जीए विणिस्सरइ बाहिं । जगगुरुणो संभविकेवलस्स भीयं व अन्नाणं ॥ १९४३ ॥ जीएऽनिलचलनवपउमराय-रयणावलीपहाए सरो । भुवणपहुणो व कंपइ भएण राउ व्व निक्खंतो ॥ १९४४ ॥
Jain Education International
For Private & Personal Use Only
www.jainelibrary.org
