________________
१३८
सिरिअणंतजिणचरियं
वरअमरकहियजयपहुवसंतकीलागइप्पहिछेण । एरावणहत्थी पहुचडणत्थं पेसिओ हरिणा ॥ १७३९ ॥ (कुलयं) रंभुव्वसी-सुकेसी-तिलुत्तमा-मंजुघोस-पमुहाओ । अच्छरसाउ वि असरिससुरयणं समलंकियाउ तिहा ॥ १७४० ॥ गंधव्वनट्टरूवाणीयदुगं पि हु महाविभूईए । पेसवियं पहु-पासे सिंगारविरायमाणंगं ॥ १७४१ ॥ इय सुरसेणाहिवई नमिउं विन्नवइ तिहुयणेक्कपहुं । जगगुरु ! अम्हे तुम्हाण पेसिया भत्तिकरणत्थं ॥ १७४२ ॥ ता निययारुहणेणं, एरावयगयवरं अलंकरह ।। इय भणिय कणयघंटारवरम्मं सो तमप्पेइ ॥ १७४३ ॥ आरुहइ पहू नक्खत्तमालियालंकियं नहं व तयं । विलसंतपुक्खरकरं खीरोयसुधं सरीरं व ॥ १७४४ ॥ परिविलसिरआरोहं सलीलगमणं वरमणिनियरं व । कुंदुज्जलचउदंतं, सिंगारिभुयंगवयणं व ॥ १७४५ ॥ तो तम्मि समासीणो, सामी चामीयरप्पहो धवले । सहइ सरयब्भयग्गे, थिरट्ठिओ विज्जुपुंजो व्व ॥ १७४६ ॥ चलियमधरियं पि सयछत्तं मुत्तावच्चूलसिरंतं । सारयछणरयणीयरबिंबं किरणोलिकलियं व ॥ १७४७ ।। रंभा-तिलुत्तमाकरचालियचमरा सिया सुवन्नपहं । मंदरमिव पहुदेहं छणचंदकर व्व धवलंति ॥ १७४८ ॥ चलिओ जएक्कनाहो, गयघडगयरायविंद-कयवेढो । वरतुरंगमारूढो पाढयमंडलियमंडलिओ ॥ १७४९ ॥ सामंताहिट्ठियरहचलंतहयगीवघग्घरालिरवं । निसुणतो चक्कारयकंसियवयाकिंकिणिसणं व ॥ १७५० ॥ चावल्लभल्लभल्लीसव्वलकुंतासिसत्तिहत्थेहिं । सेविज्जंतो पुरओ, चलंतपाइक्कचक्केहिं ॥ १७५१ ॥
Jain Education International
For Private & Personal Use Only
www.jainelibrary.org
