________________
१२९
अणंतजिणकुमारभाववण्णणं किरियं कारिज्जतो, वोट्टण-चंकमण-चूलकरणेसु । दाविज्जतो य पयाई राइणा अंगुलीलग्गो ॥ १६२३ ॥ वरिसट्ठगप्पमाणो कयाइ नियमित्तमंडलीकलिओ । दिट्ठो रन्ना तो चिंतियं इमो पाढजोगो त्ति ॥ १६२४ ॥ भणियं पहुणा तुब्भे तायमिमं पाढिउं विभावेह । विज्जा विन्नाणाइसु, किंचि अहं सयमवि मुणेमि ॥ १६२५ ॥ राएणुत्तं तुमए, विन्नाया वच्छ ! मह कहं चिंता । आह पहू निम्मलमइ-सुय-ओहीनाणओ नायं ॥ १६२६ ॥ जमइक्कंतं पुव्वं, जमिण्हि वट्टइ भविस्सइ जमग्गे । पेच्छंति दिट्ठिगोयरगयं व तं नाणिणो णूणं ॥ १६२७ ॥ तं सोऊण सहासीण-मंति-सामंत-मंडलीएहिं । जा जा चिंता विहिया, सा सा पयडीकया पहुणा ॥ १६२८ ॥ तयणु नरनाहपमुहो सव्वो वि हु विम्हिओ सहालोगो । लग्गो पहुप्पसंसं काउं कंपंतसिरकमलो ॥ १६२९ ॥ अहह अहो अच्छेरयकरचरिओ सामिसाल ! तुह तणओ । बंभ-विहप्पइ-वाईसरीण, जाओ धुवं पढमो || १६३० ॥ जो चिंतियमित्तं पि हु सुयं व सव्वं पि साहए सक्कं । किं बहुणा अत्थि न तिहुयणे वि एयारिसो अन्नो ॥ १६३१ ॥ जणओ जणणी नयरी, देसो भुवणम्मि नूण सकयत्थं । कल्लाणरयणनिहिणा, जमिमेणमलंकियं सामि ॥ १६३२ ॥ एवं सामी ! अच्छरियकारओ कमपवड्ढमाणतणू । निस्सीमरूवनिज्जियरइरमणो असमसोहग्गो ॥ १६३३ ॥ एसो उच्चधएणं वसंतमासो व्व वियसियवणेण । केवलनाणेण जिणो व्व गयणमग्गो व्व सूरेण ॥ १६३४ ।। सक्केण व सुरलोओ उदारपुरिसो व्व विलसिरजसेण । सप्पुरिसेण व वंसो सद्धम्मेणेव मणुयभवो || १६३५ ॥
Jain Education International
For Private & Personal Use Only
www.jainelibrary.org
