________________
१२८
सिरिअणंतजिणचरियं
तईय दिणे जगगुरुणो गोसपउसेसु तरणिरयणियरा । मंगलगाणपराहिं, पयासिया गोत्तवुड्ढाहिं ॥ १६१० ॥ छट्ठम्मि दिणे नवजोव्वणाहिं नियरूवनिज्जियरईहिं । लायन्नवन्नणिज्जाहिं, सारसिंगारसहियाहिं ॥ १६११ ॥ तठेणीनयणीहिं पंकयवयणीहिं पीणसिहणीहिं । वज्जिरवद्धावणयच्छंदयपयमुतनट्टाहिं ॥ १६१२ ॥ मंगलगाणपराहिं, पेच्छइ लोयच्छिओच्छवकरीहिं । विहिओ छट्ठीजागरमहूसवो पुत्तरमणीहिं ॥ १६१३ ॥ (कुलयं) पत्ते एक्कारसमे दिणम्मि संहरिय असुइकम्मं सो ।। विहियं सुइकम्मं, पहाणपमुहकिरियाहि देवीए ॥ १६१४ ॥ पत्ते दुवालस दिणे, पउणीकाऊण भक्ख-भोज्जाई । भुंजाविऊण मंडलिय-मंति-सामंत-पमुहजणोहो ॥ १६१५ ॥ उत्तमवत्थाभरणेहिं, ताण सम्माणमायरेऊण ।. सव्वाए वि पुरीए, कारवियं महूसवुक्करिसं ॥ १६१६ ॥ मणिदाममणंतं पेच्छिऊण सिविणे इमम्मि गब्भगए । एय जणणी विबुद्धा, जं तमणंतो इमो होउ ॥ १६१७ ॥ इय चिंतिय नरवइणा, दिन्नं नामं सुयस्स अणंतो त्ति । वारातिगमुच्चरिउं, वज्जते मंगलाउज्जे ॥ १६१८ ॥ परिवद्धिउं पवत्तो बालो नयरं व कित्तिपसरो व्व । लालिज्जतो पंचहिं हियाहि धाईहि अणुदिवसं ॥ १६१९ ॥ धरिऊणमभिमुहो, चाडुवयणरयणाहि आलविज्जतो । संचारिय रायंतेउरीहिं, हत्थाओ हत्थम्मि || १६२० ॥ कीलाविज्जंतो मंडलिय-सामंत-मंतिपुत्तेहिं । भत्तीए नमिज्जंतो, चउव्विहामरसमूहेहिं ।। १६२१ ॥ लल्लुरउल्लावपहिट्ठजणणि-जणएहि सव्वविज्जंतो । अंकेसु(स)रिज्जंतो नरिंदसामंतमंतीहिं ॥ १६२२ ॥
Jain Education International
For Private & Personal Use Only
www.jainelibrary.org
