________________
१२४
सिरिअणंतजिणचरियं
विन्नायपुत्तजम्मा, दासी-दासंगरक्ख-कंचुइणो । जंति निवं वद्धाविउमन्नोन्नजया य वरएण ॥ १५५८ ॥ वद्धाविओ निवो तेहिं, पुत्तजम्मेण मणिसहासीणो । तो अच्चंतं तुट्ठो, कस्स न तोसाय कुलवुड्ढी ॥ १५५९ ॥ तो मउड़वज्जवज्जावणद्धआभरणवत्थरित्थाई । दिन्नं निवेण तह ताण ईसरा ते वि जह जाया ॥ १५६० ॥
आइट्ठो य पुरीए पडिहारमुहेण पुत्तजम्ममहो । पारद्धो य जणेणं, को वा न कुणइ निवाएसं ॥ १५६१ ॥ संमज्जिऊण रत्थासु, दिज्जए कुंकुमोदयच्छडओ । रुणझुणिरब्भमरभरो, खिप्पइ कुसुमुक्करो तासु ॥ १५६२ ॥ पइमंदिरं पि किसलयतोरणसेणीहिं पवणतरलाहिं । लोयाणुरागसिंधु व्व, नज्जए गुरुतरंगिल्लो ॥ १५६३ ॥ घणदाररइयरंगावलीए, रेहति ठाविया कलसा । भाविजिणदिक्खदाणाय सज्जिया कणयनिहिणो व्व ॥ १५६४ ॥ उल्लोयलंबिहारा सकणयकलसा य संचिया मंचा । पवणचलद्धयखलहलिरघग्घरारणियकिंकिणिया ॥ १५६५ ॥ चिंधलयालंबछत्तसिक्करीतोरणावली कलिओ । विहिओ सव्वत्तो च्चिय, पायारो गोउरेहिं समं ॥ १५६६ ॥ चीणंसुय-जद्दर-देवदूस-पडिरवम्म-नम्मनेत्तेहिं । नयरीए समग्गाए, विरइयाओ हट्टसोहाओ ॥ १५६७ ॥ देसो वि कओ रन्ना, उस्सुको उक्कुरो तणयजम्मे । गिण्हिज्जए पक्खीयं, कह मह वा दाणसमयम्मि ॥ १५६८ ॥ कारविया सव्वाण वि, माणुम्माणाण निवइणा वुड्ढी । केत्तियमित्ता अहवा, कुलवुड्ढीए इयरवुड्ढी ॥ १५६९ ॥ रुयाईयं पढंता, छत्ता गच्छंति निवइणो भवणे । निग्गच्छंति य तंबोल-धणकरा तेल्लसित्तसिरा ॥ १५७० ॥
Jain Education International
For Private & Personal Use Only
www.jainelibrary.org
