________________
१२३
अणंतजिणजम्मवण्णणं आएसो त्ति भणित्ता, जंभगदेवेहिं सो समगं पि । तं काराविय सक्कस्स, सव्वमवि नमिय विन्नवइ ॥ १५४५ ॥ नियअहिओगियदेवे, सक्को आणवइ घोसह पुरीए । अमरा चउव्विहा वि हु, कलत्तजुत्ता निसामेह ॥ १५४६ ॥ जिणजणणीए जिणस्स ववरिही नियमाणसे वि जो असुहं । होऊण सत्तहा से सीसं, फुडिही न संदेहो ॥ १५४७ ॥ तो तं नयरं तिय-चचराइट्ठाणेसु घोसिउं तेहिं । आगंतुं विन्नत्तं, पुरओ अमराहिरायस्स ॥ १५४८ ॥ जिणजम्मूसवकरणा, पवित्तमत्ताणयं परिकलंतो । नंदीसरम्मि पत्तो, सक्को सद्धिं नियसुरेहिं ॥ १५४९ ॥ सासयजिणपडिमाणं, काउं अट्ठाहियामहं तस्स । सक्काइया सुरिंदा, सव्वे वि गया सट्ठाणेसु ॥ १५५० ॥ छ । सिरिअम्मएवमुणिवइविणेयसिरिनेमिचंदसूरीहिं । भणिओ अणंतचरिए, दुइज्जओ जम्मपत्थावो ॥ १५५१ ॥ (अनंतजिणचरियम्मि तइअपत्थावो) । तो पाहाइय-वज्जंतमंगलाउज्जजाय-पडिबोहा । वियसंतदीहिदिट्ठी, देवी अवलोयए पुत्तं ॥ १५५२ ॥ नवपारियाय-मंजरिपसरंतामोयचलिरअलिजालं । तणुतेयभयुब्भंतब्भमंतरयणीभवतमं व ॥ १५५३ ॥ अइनिद्धमुद्धदीहच्छि-पेच्छणुच्छलियधवल-जोण्हाए । पूरंतं वासहरं, भुवणं केवलसिरीए व्व ॥ १५५४ ॥ अच्चंतसोणसामलमणिभूसणकिरणनिग्गमच्छलओ । भाविअवायभएणं, व रागद्दोसेहिं मुच्चंतं ॥ १५५५ ॥ उव्वहमाणं सव्वंगसंगयं, थूलमोत्तियाभरणं । सुरगिरिसिणाणलग्गं, दुद्धोदयबिंदुजालं व ॥ १५५६ ॥ (कुलयं) संजायमणिमिसत्तं, परिपेच्छंतीए पुत्तयं तीए । जिणजोगे सिद्धत्तं, पि होइ दूरे अणिमिसत्तं ॥ १५५७ ।।
Jain Education International
For Private & Personal Use Only
www.jainelibrary.org
