________________
११०
सिरिअणंतजिणचरियं मुत्तूण विमाणाई, तिपयाहिणिउं नमंति जिणजणणिं । रइयकरकमलकोसा, तं संथुणिउं पवत्ताओ || १३८४ ॥ भुवणच्चणीयचरणे, तिहुयणजणजणियदुरियदरहरणे । कलहंसगमणितित्थयरजणणि जयसामिणि ! नमो ते ॥ १३८५ ॥ तुमए च्चिय संजणिओ, तित्थयरो देविनन्नरमणीए । बीय च्चिय जणइ ससिं, जणनमणिज्जं न अन्नतिही ॥ १३८६ ॥ देवि ! न महिलाणं चिय, जाया तं उत्तमा नराणं पि । सचराचरतिजयगुरुं, उप्पायंती जिणं पुत्तं ॥ १३८७ ॥ इय थोऊण पयंपंति, देवि ! नो भाइयव्वमम्हाणं । वयमट्ठदिसिकुमरीओ, तुम्ह भवणम्मि पत्ताओ ॥ १३८८ ॥ तिहुयणपहुणो परमेसरस्स जम्मणमहे करिस्सामो । भत्तिं नियाहिगारप्पयडणरूवं ति जंपेउं ॥ १३८९ ॥ तित्थंकरजम्मणघरचउदिसिजोयणपमाणधरणियलं । वेउव्वियसंवट्टगवायाहिं अट्ठहिं वि ताहिं ॥ १३९० ॥ विहियमवहरियकक्कर-तणकयवर-रेणुअसुइसंघायं । तो चिट्ठति अदूरे गायंतीओ जिणिंदगुणे ॥ १३९१ ॥ एवं चिय उड्ढदिसा, वत्थव्वाओ वि अट्ठ देवीओ । इंति महाविभूईए एरिसनामप्पसिद्धाओ || १३९२ ॥ मेघंकरा मेघवई, सुमेहा मेहमालिणी । सुवच्छा वच्छमित्ता य, वारिसेणा बलाहया || १३९३ ॥ नमिउं जिणजणणिं, काउमब्भवद्दलयमंबरे धरणिं । गंधसलिलेण सिंचिय, कुसुमभरं तत्थ विकिरंति ॥ १३९४ ॥ ठाऊण नाइदूरे, गायंति जिणिंदचारुचरियाई । पत्ताओ पुव्वरुयगाओ, तयणु देवीओ अट्ठ इमा ॥ १३९५ ॥ नंदुत्तरा य नंदा, आणंदा नंदिवद्धणा चेवा । विजया य वेजयंती, जयंती अपराजिया तह य ॥ १३९६ ॥
Jain Education International
For Private & Personal Use Only
www.jainelibrary.org
