________________
सिरिअणंतजिणचरियं जंपति य मणिमउडग्गघडियकरकमलकोसकमणीया । जय जय नंदा जय जय भद्दा, जाओ तमम्हए पहू ! ॥ १२२९ ॥ अम्हे सव्वे वि हु तुज्झ किंकरा, मणिविमाणमेयं ते । एयाओ रयणससीओ, सामि ! विलससु समग्गं पि || १२३० ॥ तो नरभवसमुवज्जियपुन्नप्पसरुब्भवं अमररिद्धिं । मण्णेइ अमाणमाणसपरिपसरियसुहरसुक्करिसो ॥ १२३१ ॥ पूयइ सिद्धाययणपडिमाओ, उसहाणणजिणपमुहाओ । कारवइ मणहराई, पेच्छणयाइं पुरो ताण ॥ १२३२ ॥ कइया वि कुणइ गिरि-सरि-जिणजम्मणमज्जणूसवे नियइ । कइया वि कुणइ नंदीसरम्मि जिणनाहजत्ताओ ॥ १२३३ ॥ कइया वि समायरइ, जंगमजिणनाहविहियवक्खाणं । कइया वि कुणइ तित्थप्पभावणं पहयविग्घयरो ॥ १२३४ ॥ रमणीयरूवसुरतरुणिसुमरणप्पत्तविसयभवसोक्खो । सो विमलमइसुयावहिनाणी. अइवाहए कालं ॥ १२३५ ॥ भणिया पढमदुइज्जा, चरियम्मि भवा अणंतजिणरन्नो । सासयसिवसुहहेडं, इह तइयभवं पयासेमि ॥ १२३६ ॥ (अणंतजिणिंदस्स तइयभवो) सायरपरिहा सहिओ जगई-पायार-वलय-दुल्लंघो । बत्तीसविजय विव णिस्सेणिसिओ वणमुहारामो ॥ १२३७ ॥ पसरियसरिरच्छोहो, कंचणगिरिनियरगुरुसुराययणो । कुलगिरिवरंडयावरियखेत्तपासायलंकरिओ ॥ १२३८ ॥ नइपडणकुंडवावीविराईओ भूरिजणवयाइन्नो । जंबुद्दीवो दीवो, समत्थि गुरुपुरनिवेसो वा ॥ १२३९ ॥ (कुलयं) तत्थत्थि चक्किभुत्तं पि, सासयं भरहनामयं खित्तं । सुहवासमवसणं पि हु, सयलत्तपयं पि छक्खंडं ॥ १२४० ॥ तमलंकरेइ माणिक्कमयमहासालसंपरिक्खित्ता । नामेण अउज्झपुरी, विहार-वावी-सराइन्ना ॥ १२४१ ॥
Jain Education International
For Private & Personal Use Only
www.jainelibrary.org
