________________
सिरिअणंतजिणचरियं
इय चिंतंतो पत्तो तुम्ह समीवम्मि गरुयवेगेण । ता पहु जं काउं मह जुज्जइ तं झत्ति आइसह ॥ १२०४ ॥ तं सोउं निवरिसिणा, भणियं भो भद्द ! भीमभवरन्ने । सत्ताण नत्थि सरणं, एक्कं मुत्तूण जिणधम्मं ॥ १२०५५ ॥ रिउणो वि हुंति मित्ता, सया वि सत्ताण धम्मवंताण ।। कल्लाणेहिं कलिज्जइ, धम्मी आगरिसिएहिं च ॥ १२०६ ॥ सोहग्गरूवरिद्धीओ, हुति धम्मेण नूण सत्ताणं । किं बहुणा सिद्धिं पि हु, सत्ता पावंति धम्मेणं ॥ १२०७ ॥ सो धम्मो जइ-गिहिभेयओ, दुहा तत्थ आइमो दसहा । खंतिप्पमुहो बीओ, अणुव्वयाईओ बारसहा ॥ १२०८ ॥ तप्पढमो कीरंतो, अविलंबं पि हु पयच्छए मोक्खं । बीओ पुणो कमेणं, जत्थेच्छा तं समायरसु ॥ १२०९ ॥ तेणुत्तं सेविज्जइ, जम्मि तुह पायपंकयं निच्चं । तं चेव गहिस्सं ता, नियदिक्खं देहि इण्हि पि ॥ १२१० ॥ तो तस्स रायरिसिणा, दिन्ना धम्मुज्जयस्स पव्वज्जा । गहणासेवणसिक्खा वियक्खणो सो लहुं विहिओ ॥ १२११ ॥ तो रायरिसी कंतारतिरियनियरं विलोडियं बहुयं । विहरेउं पारद्धो, साहुहिं समं महीवट्टे ॥ १२१२ ॥ देसेसु विहरमाणो, पडिबोहिय रायपमुहमव्वाणं केसि पि देइ दिक्खं, अन्नेसिं देसविरई पि ॥ १२१३ ॥ काण वि वियरइ दंसणमन्नेसि मंसचायनियमाई केसि पि पुणो भद्दगभावं उप्पायइ महप्पा || १२१४ ॥ इय विहरिऊण बहुकालमाउअंतं नियं विभावेउं । आलोयणं पयच्छइ, गुरुण विप्फुरियसंवेगो ॥ १२१५ ॥ उच्चरइ य रोमंचंचियंगओ साहुवयचउक्कं पि । खामइ निएऽवराहे, सत्ते ते खमइ तेसिं पि ॥ १२१६ ॥
Jain Education International
For Private & Personal Use Only
www.jainelibrary.org
