________________
अणंतजिणस्स पढमभवो
इय कायकिलेसतवोविसेससंगयसुसाहुमज्झठिओ । रायरिसी वक्खाणं कुणइ पसूणं पसंताणं ॥ ११९९ ॥ निठुरतवचरणुज्जयजइजणपभवप्पभावओ जायं । कंतारं सव्वं पि हु, पसंतवइरब्भसिरसत्तं ॥। १९९२ ॥ करि - हरि - हरिण - वराहय - वग्घप्पमुहा वि पसमिणो संता । पणमियमुणिविंदपया, रायरिसिं 'पज्जुवासंति ॥ ११९३ ॥ एत्थंतरम्मि एगो, गुरुवेगागमणमासलेस्सासो ।
संपत्तो तत्थ नरो, पणओ निवरिसि - चरणकमलं ।। ११९४ ।। दठ्ठे उव्विग्गमणो, मुणिणा सो पुच्छिओ तुमं भद्द ! । कत्तो ठाणाओ इहागओऽसि ? तो सो वि तं कहइ ॥ ११९५ ।। तो कंताराओ अदूरदेसे समत्थि वित्थिन्नो । सालिकलियाभिहाणो, गामो आरामरमणीओ ॥ ११९६ ।। तम्मि अहं हुंतो, वीरतिलयनामो पसिद्धकुलपुत्तो । वीरवईनामेणं, मह भज्जा वज्जियावज्जा ।। ११९७ ।। दोह वि अप्पाणं, पोढपेम्मवसयाण वासरा जंति । नियजोग्गयाए, दीणाइयाण दाणाई दिंताणं ।। ११९८ ।। किंतु मह माणसम्मि, रिउणो सल्लंति तट्ठसल्लं व । जं बहुकालाओ कुलक्कमागयं तेहिं सह वेरं ॥ ११९९ ॥ तो तब्भयनरविहुरो, सासंको हं सया विचिट्ठामि । साहु व्व परिहरंतो, पमत्तयं थोवकालं पि ॥ १२०० ॥ समइक्कंतनिसाए, जाव अहं सह पियाए कीलंतो । अच्छामि ताव पत्ता, रिउणो धणु - भत्थयविहत्था ॥ ९२०९ ॥ ता तेहिं घरदुवारं रुद्धं, पम्मुक्कपुक्कहक्केहिं । असहाओ त्ति वरंडयमक्कमिडं करणदाणेण ।। १२०२ ॥ कंतारयउब्भंतो, कंतारयमुज्झिऊण नासंतो । कंतारयम्मि पत्तो, कंतारयमहमणुसरामि ॥ १२०३ ॥
Jain Education International
For Private & Personal Use Only
९५
www.jainelibrary.org
