________________
सिरिअणंतजिणचरियं उल्लोयतलेसु कया, मोत्तियरयणावलीहिं पालंबा । डझंतागरुकप्पूर-परिमलो पसरइ पुरीए ॥ ११२६ ॥ पुव्वाभिमुहं रयणासणम्मि उववेसिउं सुयं रन्ना । खयरेण य उक्खित्ता, मोत्तियजलपूरिया कलसा ॥ ११२७ ॥ तो मंडलीयसामंतमंतिपमुहेहिं ते समुवक्खित्ता । पल्हत्थिया य लग्गे, सव्वेहिं वि कुमरसिरकमले ॥ ११२८ ॥ समलंकरिओ कुमरो, सचुन्न-सवत्थ-भूसणगणेहिं । वज्जिरजयआउज्जे, गिज्जते मंगलीयम्मि ॥ ११२९ ॥ मणिमउडो नियउ भूमिसामिणा नवनरेसरसिरम्मि । आरोविओ सहत्थेहिं, तित्थनाहो व्व तुट्टेण ॥ ११३० ॥ कल्लाणकोडिवित्तो, उत्तमरयणासउ समयरो य । विलसंतपुंडरीयप्पत्ता, गयरायहंसजुओ || ११३१ ॥ बहुमुत्तावलिकलिओ, निम्मलगुणगणहरो सुतारसिओ । सुहलोयतोसकारी, परिविरईय उत्तमंगपओ || ११३२ ॥ उल्लसियधम्मकेऊ, विसालुउसुमणसंसिओ सुमओ । भूरिवरालयसोहो, सुरयणपसरियपहापडलो ॥ ११३३ ॥ (कुलयं) तो भूमितलंतभालं, सपरियणो नवनिवं नमिय राया ।। उवविट्ठो भूवढे, विन्नवइ य रइयकरकोसो ॥ ११३४ ॥ देव ! इमो सव्वो वि हु अम्ह कुलक्कमसमागओ लोगो । अप्पं व पालियव्वो, सया वि सव्वावयाहिंतो ॥ ११३५ ॥ परनारी परितो गुव्वइ दुन्नओ निच्चमेव चइयव्वो । देयं कयाइ चित्तं, अयसस्स व न परदव्वस्स ॥ ११३६ ॥ नो अवयासो देओ, दुबुद्धीए व असब्भवित्तीए । पारावारेणं पिव, होयव्वमलद्धमज्झेण ॥ ११३७ ॥ सगुणो सिरे धरिज्जइ, वियसियकुसुमं व सव्वलोएण । लहइ विगुणो विणासं हरिधणुमिव बहुसुवन्नो वि ॥ ११३८ ॥
Jain Education International
For Private & Personal Use Only
www.jainelibrary.org
