________________
गिहिधम्मे चंदसेणकहा
तो विरइयसिंगारो आरूढो पोढपट्टदोघट्टे । छत्तालंकरियसिरो रमणिकरुल्लसियसियचमरो || १०८७ ॥ नानाजाणारूढेहिं, मंति- सामंत मंडलीएहिं । परियरिओ अंतेउरिकुमारपउरेहि य सहेलं | १०८८ ॥ गुरुकमनमणनिमित्तं चलिओ पत्तो य तम्मि आरामे । तद्दंसणसरसवणप्पमुक्ककरिजुत्त - निवककुहो ॥ १०८९ ॥ पविसंतो पेच्छइ छत्तलंकियं कणयपंकयासीणं । तिव्वतवतेयालुनिरिक्खदरिसणं सरयतरणिं व ॥ १०९० ॥ आयरियासाढो वि हु जोऽवहरइ सव्वसत्तसंतावं । अंगीकयसिद्धंतो वि सव्वया भवभयुब्भंतो ॥ १०९१ ॥ पविसिय सहाए कयतप्पयाहिणो महिमिलंतलाभो तं । वंदइ भत्तिपुलईओ आणंदपवत्तनयणंसू ।। १०९२ ॥ अवरं पि साहुविंदं वंदिय पुणरुत्तपणयगुरुचरणे । उवविट्ठो सुरखेयरसहाए, पहुवयणगयनयणो ।। १०९३ ।। तो गुरुणा वि नरिंदं, उद्दिसिउं देसणा समारा । इह विसयासत्ताणं कत्तो सत्ताण वेरग्गं ? || १०९४ ॥ जह वडिसामिसलुद्धा निव ! मीणा पाउणंति मरणाई | तह विसयसुहासत्ता, सत्ता वि लहंति दुखाई ।। १०९५ ।। हरिणाण जह मायाहिं तत्तिसाए होइ वोच्छेओ ।
तह सत्ताण वि कत्तो तित्ती विसयाहिट्ठियमणाण ।। १०९६ ।। कूडेसु जहा निवडंति पक्खिणो पक्खमिक्खिरं झति । निवडंति तहा नरए सत्ता विहु सेविउं विसए । १०९७ ॥ जह मणहरो वि पडिउं जाइ कलावो सिहीण वरिसंते । कंतो वि तहा देहो देहीण वि आउअंतम्मि ।। १०९८ ॥ पसरंतसूर - करोपरि विलसिरचंदभूसणधरा वि ।
न हवइ थिरस्सरूवा, सया वि रयणि व्व रायसिरी ।। १०९९ ॥
Jain Education International
For Private & Personal Use Only
८७
www.jainelibrary.org
