________________
८६ .
सिरिअणंतजिणचरियं कुमरजणणीए पणमिय उवविट्ठा तीए वामपासम्मि । तह सेसमंडलेसर-सामंतेहिं नओ राया ॥ १०७४ ॥ तो खेयरकुमराईण, रयणभूसणविसिट्ठवत्थेहिं । विहिओ सम्माणो, अप्पमाणतोसेण नरवइणो ॥ १०७५ ॥ सव्वे वि तओ निययावासेसु विसज्जिया महीवइणा । संपत्ता सट्ठाणे नमिय नरिंदस्स कमकमलं ॥ १०७६ ॥ सह खेयरेण नमिउं, निवक्कमे नियपियाजुओ कुमरो । संपत्तो पासाए विचित्तचित्ताभिरामम्मि ॥ १०७७ ॥ गुरुगोरवेण दिवसाई, कइ वि धरिउं विसज्जिओ खयरो । निवकुमरनओ वेयड्ढमुवगओ सो स-परिवारो ॥ १०७८ ॥ नवकंता संजुत्तस्स, रायपुत्तस्स बहुविणोएहिं । वच्चंति वासरा जणयपायसेवापसत्तस्स ॥ १०७९ ॥ अह अन्नया नरिंदो, अमच्च-सामंत-मंडलियकलिए । उवविट्ठो अत्थाणे, कुमरुच्छंगियकमंबुरुहो || १०८० ॥ मणि-कणय-दंडमंडियकरेण पणमिय दुवारपालेण । विन्नत्तो सीमंत-ग्ग-संगि-करकमलकोसे ॥ १०८१ ॥ आरामपालओ पहु ! पत्तो बउलावयंसओ नाम । मुच्चउ नव त्ति ? तो सो राइणा वुइए तयं मुयइ ॥ १०८२ ॥ तो सो पविसिय अत्थाणमंडवट्ठियमहासणनिसन्नं । नमिय नरिंदं विणइं एवं विन्नविउमारद्धो ॥ १०८३ ॥ देव ! कलहंसविलसियनामारामे मणोभिरामम्मि । सिरिचित्तरक्खपहुणो, गुरुणो तुम्हाण संपत्ता ।। १०८४ ॥ तन्नाम पि हु सामीण ति-जयरज्जाहिसेय-सुह-जणयं । ता तक्कमनमणं पइ कयायरा सामिणो हुंतु ॥ १०८५ ॥ तं सोउं अवणिवइणा पमुईयचित्तेण झत्ति सम्माणो । तह विहिओ जह नट्ठदारिदं तस्स सिविणे वि ॥ १०८६ ॥
Jain Education International
For Private & Personal Use Only
www.jainelibrary.org
