________________
सिरिअणंतजिणचरियं
खित्तो य पुप्फपयरो पुरम्मि परिभमिरभमररवरम्मो । पडिजद्दराइवत्थेहिं हट्टसोहा उ विहियाओ || १०२२ ॥ कणयमयदप्पणस्सेणिसुंदरा संचिया पहे मंचा । अनिलचलालवद्धयचिंधरणझणिरकिंकिणिया ॥ १०२३ ॥ हल्लप्फलउत्तालब्भमंतलीलावई विहियसोहं । पत्तं वीवाहदिणं विलाससिंगारगारवियं ॥ १०२४ ॥ परिणयट्ठाणत्थं कुमरो वाहरिओ रायमंतिवग्गेण । ण्हाओ दहिदुद्धक्खयगोरोयणलसिरसीमंतो ॥ १०२५ ॥ रयणाभरण-विराईय-सरीर-करिरायखंधमारूढो । मुत्तावचूलविलसंत-छत्त-अंतरियरवितावो ॥ १०२६ ॥ पणरमणीकरयलचलिरचारुचमरोहसोहियसरीरो । उच्छलियरयणभूसण-करहरि-धणु-गण-विराइतणू ॥ १०२७ ॥ उम्मत्तवारणस्सेणिचडियगंडलियमंडलाणुगओ । हयचडियचारुसामंतचक्कचंकमणकयसोहो ॥ १०२८ ॥ रहरयणासीणमहीअसव्वसंचरणजणियसिंगारो ।। तिव्वाउहगहणव्वग्गसुहडसंघडियपरिवेढो || १०२९ ॥ विज्जाहरकुमराणीयखेयराणीयमणिविमाणेहिं । पूरंतो गयणयलं रणंतकिंकिणि-कलावेहिं ॥ १०३० ॥ वज्जंतमंगलाउज्जसद्दपरिपूरियंबरदियंतो ।। परिणयणत्थं चलिओ कुमरो रिद्धिप्पबंधेण ॥ १०३१ ॥ अवलोयंतो खेयरविलासणीविहियविविहनट्टाई । आयन्नंतो अविहवविलयाउग्गीयगीयाई ॥ १०३२ ॥ बंदीहिं पढिज्जंतो, पत्तो वीवाहमंदिरद्दारे । उत्तरिय गइंदाओ अणुहविउं मंगलायारो ॥ १०३३ ॥ पविसिय माइहरम्मिं, उवविट्ठा जत्थ चिट्ठए कुमरी । जणचक्खुहरणकज्जे व नज्जए वत्थआवरिया ॥ १०३४ ॥
Jain Education International
For Private & Personal Use Only
www.jainelibrary.org
