Page Text
________________
५४ वद्धमाणसामिचरियं ।
२८७
विविहरसकरणकलतारमंदसंगीयवियक्खणाओ णट्टकुसलाओ परिकलियकलवल्लईवंसव(म)गहराउज्जसंजुयग्गहत्थाओ मणहरवेसा-ऽलंकारसललियंगीओ तियसविलासिणीओ, समागयाओ य जिणपायमूलं, साहिलासं च पलोइरं पयत्ताओ। कहं ?
सुरविलयाणं तक्खणविलासगुणघडणणिग्गया सहसा । जयगुरुणो कुसुमसर व्व पेसिया दिद्विविच्छोहा ॥१९६।। कीए वि कुसुमसंसत्तभमरमुहलोल्लसन्तधम्मेल्लो । कुणइ व्व भुवणगुरुणो संगमसुहपत्थणावणइं ॥ १९७ ॥
वेल्लहलकरयलंगुलिकलणासंजणियणीविविण्णासं । संजमइ ल्हसंतुव्वेल्लपल्लवं का वि हु कडिल्लं ।। १९८ ॥ रमणपुलिणम्मि णिवडइ का(की)य वि भीया पोहराणं व । हंसावलि ब णिम्मलरणंतकलरयणमेहलिया ॥१९९।।
वेल्लहलकरयलोयरणिवेसियं ललियभुवलयाणालं । लीलाकमलं पिव वहइ का वि महुगंधरिदिल्लं ।। २०० ॥ पत्थेइ कण्णमूलावलग्गणीलुप्पलावयंसेण । णिययकडक्खेग व मणहरेण रइकीलियब्वाइं ॥ २०१॥ कोमलमुणालवेल्लहलविन्भमिल्लाहिं बाहुलइयाहि । महइ अायासिउं रसवसुच्चरोमंचमुहयाहि ॥ २०२॥ ल्हसियंसुयसंजमणेण काइ पडिवक्खमच्छरेणं व । पडिमावडियं सिहिणत्थलम्मि पिहइ व्व जयणाई ॥ २०३ ॥ इय सयलजला(णा)हिगमुल्लसन्तसविसेसरूवसोहग्गो । सुरकामिणीयणो होइ भुवणगुरुलंभलोहिल्लो ।। २०४ ॥
एवं च तियसंगणायणो भूभंगविलासोल्लसंतलोयणाहिरामो कबोलमूलावलग्गलंबालउल्हसियकोन्तलकलावो बद्धसिढिलणियंसणो कसणरोमावलीकलियतिवलीतरंगमज्झो वियडणियम्बुव्वहणकिलन्तवेविरोरुजुयलो अच्चुण्णयपेढालसिहिणमंडलो जयगुरुदंसणजणियाऽउन्नविम्हओ पुरओ लिहिउ व परिसंठिओ, ससन्मसवेविराषयवो य जंपिउं पयत्तो। कहं ?
अणहिमओ कीस मणम्मि तुम्ह सुसुरहिविलेवणविलासो? । ओ ! मुणियं तुह साहीणपरिमले लहइ ण हु सोहं ॥२०५॥ कीस ण रज्जइ हिययं सुविचित्तविहत्तवण्णरुइरेहिं । पयइचलयंपिराएहि मुहय ! मणलग्गिरेहि पि? ॥२०६॥ दे ! पसिय पणामिज्जउ घडन्तगाढोवगूहियवमुहं । अलियकरुणाकिलम्मिर ! किलामियंगाण णियययणे ।।२०७॥ तेल्लोकपत्थणिज्जम्मि मणुयदुलहे मगोरहाणं पि । सुररमणिमुहे णो घडइ मुहय ! विवरम्मुहीहोउं ॥ २०८ ॥ कह वा अणुपं ण य कुणेसि रमियनपरिचएणं पि ? । मयणाउराण णिकिव ! मुणसि चिय जूरियव्वाई ॥२०९॥
अच्छउ वा विविहविलास-हास-सब्भावणिम्भरं पेमं । सामण्णाए वि दिट्ठीए सुहय ! किं णो पलोएसि? ॥२१०॥ जे तुह मणम्मि मउए वि सायया मयरकेउणो भग्गा । ते चेय मंतुकढिणऽम्ह कह णु भिंदंति सुहय! मणं? ॥२१॥
अहवा अण्णसुहासंगरायरसिए जणम्मि अणुराओ । जं कीरइ तं जायइ अरण्मरुइयस्स सारिच्छं ।। २१२ ॥ इय जयगुरुणो मयणाउराण सुरसुंदरीण भणियाई । सिद्धिसुहसंगमूसुयमणस्स चित्तं ण रामन्ति ॥ २१३ ॥
एवं च तासिं ण सुइसुहजणणगीयसदेण, ण य महुरवेणु-वीणाविणोएण, ण विविहकरणंगहारकलियणट्टोवहारण, ण य सविन्भमुब्भडवियंभियदिद्विविच्छोहेहिं, ण साणुणयसणिउणभणियबयविसेसेहिं पक्खुहिओ जयगुरू । एत्थावसरम्मि य पहायप्पाया जामिणी ।
तो(तत्तो) अरुणकरप्फंसकयवियासा सरोरुहच्छाया । तियसंगणाण हसइ ब्व मुहसिरिं भग्गमाणाण ॥ २१४॥ पच्छिमदिसासमल्लीणमंडले ससहरे कुमुइणीए । कजलकलुसा वियलंति बाहबिंदु व्व भमरगणा ॥ २१५ ॥ उव्वेल्ललवंगामोयमासलो कमलपरिमलसुयंधो । अणुलिंपइ ब पच्चूसमारुओ सयलजियलोयं ॥ २१६॥ ससिकिरणपहरफुट्ट घडिज्जए पवणविहुयदलणियरं । रविणा सवेयणं पिव करेहिं परिवेविरं कुमुयं ॥ २१७ ॥ मेलेइ विरहविहुराई चक्कमिहुणाई पियसहि व्य फुडं । संझासरोयरुच्छंगरुइरसयणीयचम्मि ।। २१८ ॥
Jain Education International
For Private & Personal Use Only
www.jainelibrary.org
| SR No. | 001442 |
| Book Title | Chaupannamahapurischariyam |
| Original Sutra Author | Shilankacharya |
| Author | Amrutlal Bhojak, Dalsukh Malvania, Vasudev S Agarwal |
| Publisher | Prakrit Text Society Ahmedabad |
| Publication Year | 2006 |
| Total Pages | 464 |
| Language | Prakrit, English, Hindi |
| Classification | Book_Devnagari, Literature, & Story |
| File Size | 14 MB |