Page Text
________________
१० चंदप्पहसामिचरियं । गिरवायणेव्वुइपुरं सिग्घमविग्घेण जेण पावेति । जं परवाइमतीणं दूरम्मि ठियं महाविसयं ॥ १६ ॥ इय तं पयडेसु जए महाणुभावेहिं पुव्वमायरियं । तित्थं जयणाह ! तुमे तेलोकविद्वत्तमाहप्पं ॥ १७ ॥ इय एवमाइ लोयंतिएहि लोयग्गगमणववसाओ । पडिबोहिओ महप्पा णिओयवत्तीहिं देवेहिं ॥ १८ ॥
एवं लोयंतियदेवेहि पडिबोहिओ पइण्णामंदिरं पोसस्स बहुलतेरसीए समारूढो। तिण्णि य मासे छउमस्थपरियायमणुपालिऊण पुण्णागपायवस्स छायाए चेत्तसुद्धपंचमीए अणुराहाणक्वत्ते केवलमणुपत्तो । पवाविया य अट्ठासीइं गणहरा । विरइयं देवेहिं समोसरणं । पत्थुया धम्मकहा भगवया । साहिओ संसारसहावो, पयडिओ मोक्खमग्गो । तओ लद्धावसरेणं भणियं गणहरेणं-केरिसो उण मोक्खो ?, किं वा सरुवं मुत्ताणं ?। भगवया भणियं-सुणसु ।
इह सोहम्माइया उवरोवरिट्ठिया बारह देवलोया, तेसिमुवरि णव गेवेज्जाणि । पुणो पंच महाविमाणाणि । सव्वहविमाणाओ उवरिं बारसेहिं जोयणेहि सिद्धी। सा य अच्चंतणिम्मला, बहुमज्झदेसभाए अट्ट जोयणाणि बाहल्लेग, बहुमज्झदेसभायाओ कमेण य हीयमाणा मच्छियपत्ताओ परंतेसु तणुययरी । तत्तो य ईसिपब्भाराए पुढवीए उवरि जोयणं, तस्स य चउभाओ, तस्स वि छन्भाए सिद्धाणमवगाहो त्ति । धणूण तिणि सयाणि तेत्तीसाणि धणुतिभागो य उँकोसा सिद्धाणोगाहणा। अट्ठ समया णिरन्तरं सिझंति । उक्कोसेणं समएण अछुत्तरं सयं सिज्झइ त्ति । तत्थ य सिद्धा अजराऽमरा उवउत्ता दंसणे य गाणे य साईयमपज्जवसाणं कालं चिट्ठति । अवि य
कम्मक्खयसंभूयं अञ्चतेकंतसासयं सोक्खं । जह अणुहवंति जीवा मोक्खे तं मे णिसामेह ॥ १९ ॥ सव्वट्ठविमाणाओ बारसजोयणपहम्मि वरसिद्धी । माणुसखेत्तपमाणा उम्मुहसियछत्तसंठाणा ॥२०॥ सा य बहुमज्झदेसे अटेव य जोयणाणि बाहल्लं । परंतेसु य तणुई मच्छियपत्ताउ तणुअयरी ॥ २१ ॥ उत्ताणयसियछत्तायाराए तीए जोयणतुरीए । जो छब्भाओ तत्थ य सिद्धाणोगाहणा भणिया ॥ २२॥ पुण्णं च तह पवित्तं पहाणकल्लाणमंगलमुदारं । लोगुत्तरं सुहं ति य परमपयं सासयं भणियं ।। २३ ।। अजरममरं अरोगं अकिलेसं सयलदंदपरिहीणं । अच्छेज्ज अब्भेयं अणुत्तमं तं अणावाहं ॥ २४ ॥ जमगोयरे अभव्वाण, भवियलोयस्स गोयरीभूयं । तं मोक्खपदं संसंति दिववरणाणिणो सययं ॥ २५॥ सम्मदंसण-णाणेहिं से मियियं जं चरित्तमारूढा । ते पाउणंति मणुया अभंवभितरे णियमा ॥ २६ ॥ जे सीलभारवहणुज्जया सया तह तवम्मि उज्जुत्ता । ठइयामवदाराऽऽरम्भवज्जिणो गुत्तिगुत्तिल्ला ॥ २७ ॥ अट्ट रोई झाणं चइऊणं धम्म-मुक्कझायारो । सुहपरिणामा णिज्जियमोहा विच्छिण्णकामा य ॥ २८ ॥ समतण-कंचण-मणि-लेढुभावभावेहिं भावियसरीरा । बारसविहे तवम्मि य कम्मक्खयकारणऽग्यविया ।। २९ ॥ तित्थयरवयणपंकयविणिग्गयाऽऽयमविसारया धीरा । अंगाण बारसण्हं पुयाण य णिच्छयविहण्णू ॥ ३०॥ लहिऊण केवलं खवयसेढिइ कमेण खीणकम्मंसा । सेलेसिं गंतूणं मुणओ परमं पदं जन्ति ॥ ३१ ॥ उक्कोसेणऽसयं सिज्झति समएण मुकबंधाणं । विरहो जहण्ण समओ, उक्कोसो होइ छम्मासा ॥३२॥ आरोहंति जिगिंदा छ च्चेव य दस उ पंच य विबुद्धा । समएणं सिद्धिपहं दियलोयचुयाण अट्ठसयं ॥ ३३ ॥ उक्कोससरीरा "दोण्णि जंति चत्तारि हेट्ठिमा समए । अटेव उ मज्झिमया समाणदेहा उ सिद्धिगति ॥ ३४॥ एरंडफलं अग्गी जहा सहावेण होति उड्ढगती । तैध सिद्धाण मुणेजह कम्मविमुक्काण लोयग्गे ॥ ३५ ॥ ण परेण होइ गमणं लोयग्गाओ उवग्गहाभावा । तत्थेवावट्ठाणं पुणागमणकारणाभावा ॥ ३६॥ सम्मत्त णाण दंसण मुहमत्तं वीरियं च उग्गाहो। अगरुयलहयाऽबाहा अट्र गुणा होति सिद्धाणं ॥ ३७॥ दड्ढम्मि जहा बीए पहवइ य ण अंकुरो त्ति सुपसिद्धं । तह कम्मबीयदाहे भवंकुरो णेय संभवइ ।। ३८ ॥
१यन्वुिइ जे । २ त्वम् । ३ एत्तो वि ई जे । ४ उक्कोसोगाहणा सू । ५ रा अमरा जे । ६ तम्भे सू । ७ जोवणाणि सू। ८ मरोग जे सु। ९ समिइयं जे । १० भवऽभतरे जे । ११ सेढिकमेण जे, सेढिकम्मेण सू । १२ दोहि सू । १३ तह जे । १४ 'ग्गा होउव' सू।
Jain Education International
For Private & Personal Use Only
www.jainelibrary.org
| SR No. | 001442 |
| Book Title | Chaupannamahapurischariyam |
| Original Sutra Author | Shilankacharya |
| Author | Amrutlal Bhojak, Dalsukh Malvania, Vasudev S Agarwal |
| Publisher | Prakrit Text Society Ahmedabad |
| Publication Year | 2006 |
| Total Pages | 464 |
| Language | Prakrit, English, Hindi |
| Classification | Book_Devnagari, Literature, & Story |
| File Size | 14 MB |