Page Text
________________
४ सगरचक्कवट्टिचरियं ।
आणं कुणंति ससुरा-ऽसुर-नर-विज्जाहरिंदा, अपडिहयं पोरुसं, महन्तं बलं, अपरिमियं वीरियं, अपडिहओ जसो, अणुवमो चाओ, असाहारणं सरणागयवच्छलत्तणं, अणण्णसरिसा दीणा-ऽणाहसमुद्धरणसीलया, ता देव ! असरणो सरणागओ देवस्स, दीणमब्भुद्धरणं च सहजायं महापुरिसाणं, तओ काऊण करुणं मह देउ देवो पुत्त्रं ति, अवि य
जेऊण हयकयंत मज्झ सुयं देसु देव ! सयराहं । तुह पोरुसं महायस ! जेणाऽमलियं पवित्थरइ ॥ ११४॥ कजं विणा वि भुवणे अब्भुद्धरणं कुणंति जे धीरा । ते वंदणिज्जचरिया वैरपहु ! तुम्हारिसा विरला ॥११५॥ दीणाण समुद्धरणं, भयम्मि रक्खा, गुरुम्मि तह विणओ । दप्पुधुराण समणं, दाणं दारिदतवियाण ॥ ११६॥ सव्वस्स पियंवयया, बंधुसिणेहो कयण्णुया सच्चं । सप्पुरिसाण महायस ! सययं चिय होइ, किं भणिमो ? ॥११७॥
ता महाराय ! कुणसु मह परित्तं पुत्तदाणेणं"। ति भणिए [? भणियं राइणा-] "किं गहगहिओ सि, वायच्छंदिओ सि, उम्मत्तो सि, पराहीणो सि, अण्णायपरमत्यो सि, बालो सि, गयचेयणो सि, जेणेवं वाहरसि ? ।
सो पत्थि चिय भुवणे वि कोवि जो खलइ तस्स माहप्पं । सच्छंदचारिणो सबवेरिणो हयकयन्तस्स ॥११८ ॥ सीयन्ति सव्वसत्थाई तत्थ, ण कमंति मंतिणो मन्ता । अद्दिठ्ठपहपहरणम्मि तम्मि किं पोरुसं कुणइ १ ॥ ११९ ॥ ण बलेण तस्स केणइ पडियारो, णेय तंतजुत्तीए । आसेहिं रहवरेहिं य, अत्यो वि णिरत्थओ तत्थ ॥१२०॥ इय अप्पडियारे हयविहिम्मि संसारवत्तिणो जीवा । वट्टति तस्स आणाए, एत्थ को कीरउ उवाओ ? ॥१२१॥ किंचजइ तस्स होज्ज एकस्स चेय संसारगोयरगयस्स । मरणं ण उणो अण्णस्स जंतुणो हयकयंताओ ॥ १२२॥ ता जुज्जइ रोयण-पिट्टणाइयं काउमस्स लोयस्स । एकस्स जओ मह परिहवो त्ति सयलम्मि जियलोए ॥१२३॥ अह पुण ससुर-णरा-ऽमर-विजाहर-किष्णरिंदपमुहाण । सामण्णं चिय मरणं ता इमिणा किं पलत्तेण ? ॥१२४॥ मज्झं च भरहखेत्ते सहिसहस्सा सुयाण विहरन्ति । को कुणउ ताण ताणं कवलिज्जन्ताण कालेण? ॥ १२५ ॥ मा रुयसु, मुंच सोयं, कज्जं चिंतेहि, कुणसु अप्पहियं । जाच ण तुमं पि एवं कवलिज्जसि कालरत्तीए" ॥ १२६॥
एयमायणिऊण भणियं बंभणेणं-महाराय ! मह पुत्तसोयाऽभिभूयस्स भोयणं पि ण रोयइ किमंग पुण करणिज्जं । राइणा भणियं-"संपयं चेव तुमए णिवेइयं जहा-सव्वो वि लोओ वचगए बंधुयणम्मि णियकज्जपरायणो चिट्ठइ ति, तुमं पुण एगागी चेत्र किमाउलो सि ?, जओ अवहत्थियसयलवावारो एवं विलवसि । अवि य
सव्वस्स वि एस गई होही कालेण जीवलोयम्मि । णियकम्मऽज्जियवसगस्स जंतुणो कि थ रुण्णेणं ? ॥ १२७॥ सव्वस्स एस मच्चू विओयकरणम्मि पञ्चलो धणियं । संजोयं ण उ णो कुणइ पालणं पावपरिणामो ॥ १२८॥ दुक्खं अवणेइ फुडं राया जो तस्स गोयरे पडइ । एसो उण देवेहिं वि ण तीरए णिययमवणेउँ" ॥१२९॥ इय एवमाइ बहुयं भणमाणं चक्कवट्टिणं विप्पो । पडिभणइ सच्चमेयं भरहाहिव ! जं तुमे कहियं ॥१३०॥ णाऊण सव्वमेयं णरवइ ! संसारविलसियमसारं । सोयं णऽरिहसि काउं जमहं साहेमि तं देव ! ॥ १३१॥ एयं कह सद्धेयं सौहिप्पंतं मए वि परणाह !। अहवा तं पत्थि च्चिय संसारे जं न संपडइ ॥१३२॥ हय-गयवर-वररहसंजुया वि ते चेय तुम्ह गरणाह ! । पुत्ता जुगवं पत्ता पंचत्तं विहिणिओएणं ॥ १३३ ॥
एत्यंतरम्मि सामन्त-महासामन्त-मन्तिपमुहा महामंतिणो अण्णे य कुमारासण्णवत्तिणी पाडयाप पच्छाइवउत्तिमंगा विमणदुम्मणा भग्गमच्छरुच्छाहा अकयसरीरपडिकम्मा चिंताभरसीयंतदेहा किंकायब्वमूढा पविठ्ठा राइको अत्याइयामंडवं । पणमिऊण य रायं जहारिहं उवविठ्ठा चलणऽन्तिए। तओ राया अणासंकणीयं असंभावियउव्वं तं वयणमायण्णिऊण, दद्रूण य कुमारपरिवारं दुम्मणं थंभिउ ब्व लिहिओ ब्व मूढो व्व संजायमुच्छागमो व्व चरडिउ व्व णिच्चलणयणो पइक्खणं पडिव
१ वरबहु । जे। २ साहिय्यतं जे। ३ णो पड(ड)पच्छा जे।।
Jain Education International
For Private & Personal Use Only
www.jainelibrary.org
| SR No. | 001442 |
| Book Title | Chaupannamahapurischariyam |
| Original Sutra Author | Shilankacharya |
| Author | Amrutlal Bhojak, Dalsukh Malvania, Vasudev S Agarwal |
| Publisher | Prakrit Text Society Ahmedabad |
| Publication Year | 2006 |
| Total Pages | 464 |
| Language | Prakrit, English, Hindi |
| Classification | Book_Devnagari, Literature, & Story |
| File Size | 14 MB |