________________
रिट्ठणे मिचरिउ
[१३] दूसासणु दुमय-सुएण भग्गु कियवम्मु णवर पहरणहं लग्गु एत्तहे आढत्ताओहणेण वुच्चइ सच्चइ दुजोहणेण डज्झउ धिगत्थु एहु खत्त-धम्म सहुं पइ-मि करेवउ कूर-कम्मु होतउ आसि महु परम-मित्तु पहरेवउ एवहिं मई णिरुत्तु सिणि-णंदणु पभणइ वद्ध-रोसु खत्तियहं रणंगणे क्वणु दोसु छुडु साउहु संमुहु थाउ को-वि हम्मइ गुरु-पुत्तु सहोयरो-वि अवरोप्परु ए आलाव जाम राहेय-भीम पडिलग्ग ताम किउ मारुइ वि-रहु वियत्तणेण तव-णंदणु भणइ हियत्तणेण लहु धावहु धाइउ भीमसेणु चंपाहिउ दीसइ भीम-सेण्णु सामंत पधाइय भग्गु कण्णु दोणायरिएण-वि पंडु-सेण्णु
घत्ता सय पंच हयइं पंचालहं सट्ठि सयई पुणु सिंजयहं। दस दंति-सहासई मारेवि धाइड भीम-धणंजयहं ।।
_ [१४] तो जमल करेप्पिणु चक्क-रक्ख तोसावेवि किण्णर-सिद्ध-जक्ख धट्ठज्जुणु दोणहो समुहु ढुकु णं गहु णिय-थाणंतरहो चुक्कु णं धाइउ केसरि कुंजरासु णं विजु-पुंजु धरणीहरासु णं विणया-णंदणु विसहरासु णं गहकल्लोलु दिवायरासु पच्चारिउ दुमयहो णंदणेण कहिं जाहि थाहि सहुं संदणेण हउं पलय-कालु उप्पण्णु तुज्झु जिह हउ जणेरु तिह देहि जुज्झु तो एंतु पडिच्छिउ दियवरेण सुरसरि-पवाहु णं सायरेण परिभमिय रहेहिं हेमुज्जलेहिं अब्भंतर-वाहिर-मंडलेहि
घत्ता वसुदाणु ताण थिउ अंतरे तासु वि तोडिउ सिर-कमलु। पहरंतहं गुरुण णिहम्मइ मणे आसंकिउ पंडु-वलु।।
Jain Education International
For Private & Personal Use Only
www.jainelibrary.org
