________________
३७४
सिरिसोमप्पहसूरि-विरइयं पसत्थ-पयत्थ-पेसणेण पवड्डमाण-मण-पमोयाण ताण गएसु कइवयदिणेसु सामदेवेण सयं गंतूण घरं भणिओ भद्द सिट्ठी- अम्ह पुव्वं पि तुह सुयरस निय-धूयं दाउं मणं आसि | संपयं पूण खयराओ रक्खंतेण इमिणा विक्कमेण किणीया एसा । ता पडिच्छ तुमं सुयस्स जुग्गं मे धूयं । पडिच्छिया सा भद्द-सिहिणा । वत्तो वीवाहो । भुंजए भोए गुणमईए समं देवदत्तो | कयाइ जिन्नुज्जाणे गाढप्पहार-विहुरो कंठ-गय-पाणो दिहो देवदत्तेण जोगी । सत्थीकओ भणिउं पवत्तो- जोगप्पा नाम जोगीऽहं । जोगसिद्धी मे भज्जा । कायसिद्धि-निबंधणं आउवुड्डि-कारणं कालवंचणा-पवणं पवण-निरोहाईयं जोग-मग्गं गुरूवइडं अणुचिलुतो जाव चिहामि ताव मिलिओ मे जोगसारो जोगी । कया तेण मए सह कवडमित्ती । नत्थि जोगीणं अकज्जं अखज्जं अपेज्जं अगम्मं च किंचि त्ति भणंतेण कराविओ हं मज्जपाणं । ममं मज्ज-मत्तं गाढप्पहारेहि पहणिऊण मओ त्ति मुत्तूण चित्तूण मे भज्जं जोगसिद्धिं पणहो जोगसारो । देवदत्तेण वुत्तं- भद्द ! अणुचियमिणं मज्ज-पाणं । जओ
नच्चइ गायइ पहसइ पणमइ परिभमइ सुयइ वत्थम्मि । तूसइ रूसइ निक्वारणं पि मइरा-मउम्मत्तो ||२५४१|| जणणिं पि पिययमं पिययमं पि जणणिं जणो विभावंतो । मइरा-मएण मत्तो गम्मागम्मं न याणेइ ।।२५४२।। न हु अप्प-पर-विसेसं वियाणए मज्जपाण-मूढ-मणो | बहुमन्नइ अप्पाणं पहुं पि निब्भच्छए जेण ||२५४३|| वयणे पसारिए साणया वि विब्भमेण मुत्तंति । पह-पडियरस सव्वस्स दुरप्पणो मज्जमत्तस्स ॥२५४४।। धम्मत्थ-काम-विग्धं विहणिय-"मइ-कित्ति-कंति-मज्जायं । मज्जं सव्वेसिं पि हु भवणं दोसाण किं बहुणा ? ||२५४५।। जा कायसिद्धि-बुद्धी जल-गय-ससि-बिंब-गहण-वंछा सा । पच्चक्खेण सरीरे विणस्सरे दीसमाणम्मि ||२५४६।। जं कयगं तमणिच्चं ति जुत्तिओ भंगुरत्तणे सिद्धे । कायस्स थिरीकरणं सुरचाव-सिरीकरण-तुल्लं ।।२५४७।।
Jain Education International
For Private & Personal Use Only
www.jainelibrary.org
