________________
३२०
सिरिसोमप्पहसूरि-विरइयं वंझ बिति जहिच्छ-सत्थ-पढणं अत्थावबोहं विणा, सोहग्गेण विणा मडप्पकरणं दाणं विणा संभमं । सब्भावेण विणा पुरंधि-रमणं नेहं विणा भोयणं, एवं धम्म-समुज्जमं पि विबुहा सुद्धं विणा भावणं ।।२२२३।। उभय-भवेसु असुद्धा निदिहा भावणा दुह-निमित्तं । स च्चेय सुक्ख-मूलं सुद्धा जह खुड्डगाईण ||२२२४।। तहाहि
[५. भावनायां क्षुल्लकादि कथा] अत्थि इह भरहवासे संकेय-निकेयणं व साकेयं । नयरं पिहुलच्छीणं पि हु लच्छीणं वर-मुणीणं ||२२२५।। वेरि-करि-पुंडरीओ परिपंडुर-पुंडरीय-रुद्ध-दिसो । सिरि-केलि-पुंडरीयं तत्थ निवो पुंडरीओ त्ति ।।२२२६।। तस्स भुयदंड-कुंडलिय-चंड-कोयंड-कंड-तुंडेहिं । खंडिय-विपक्ख-मुंडो कंडरीओ अत्थि जुवराओ ||२२२७।। कंता कांचण-कंती ससिकंता नाम पुंडरीयस्स । तीए सुओ जसभद्दो भद्दगइंदो व्व दाणपरो ||२२२८।। भद्द-गुण-विढत्त-जसा जसभद्दा भद्द-हत्थि-समगणणा | जाया जाया वर-सील-मंडणा कंडरीयस्स ।।२२२१।। जिस्सा सरीर-सुंदरिम-दलीअ-दप्पाओ देव-रमणीओ । लज्जंतीउ व्व न दंसयंति लोयम्मि अप्पाणं ||२२३०।। तं कहवि पूंडरीओ दहं लावन्न-लच्छि-कुल-भवणं । मयण-सर-विहुर-चित्तो चिंतिउमेवं समाढत्तो ||२२३१|| चंदो इमीए मुह-पंकएण जित्तो समुद्द-सलिलम्मि । मज्जइ निच्चं पि कलंक-पंक-पक्खालणत्थं व ||२२३२।। एईए बालाए लोयण-लायन्न-लीह-"लुद्धाइं । मुद्धाइं मयकुलाइं वणवास-वयं व सेवंति ||२२३३|| एईए अहर-हरियारुणिम-मरहाई लज्जमाणाई । बिंबफलाइं उब्बंधणं व वल्लीसु विरयंति ||२२३४।।
Jain Education International
For Private & Personal Use Only
www.jainelibrary.org
