________________
सिरिभुयणसुंदरीकहा ॥
पंचमि-दसमितिहीसु य विसेसतवसंजुया य कोहंडि(डिं) । आराहइ एक्कमणा पुव्वुत्तविसेसपूयाहिं ॥९३५।। अन्नम्मि दिणे सियपंचमीए कयजागराए देवीए । निसि पच्छिमम्मि जामे अंबाए सा इमं भणिया ॥९३६॥ दढसम्मत्तगुणेणं जिण-गुरुपयपूयणेण तुह पुत्ति! । रंजियचित्ता अहयं तुट्ठ म्हि वरं वरेसु त्ति ।।९३७॥ कारणमिह जिणभत्ती जिणभत्ताणुग्गहम्मि मह बुद्धी । जिणभत्तिवज्जियाणं मह भत्ताणं पि नो सिद्धी ।।९३८।। जं चिंतिउं न तीरइ अच्छउ वोत्तुं तयं पि पत्थेहि । संपाडेमि अवस्सं वच्छे ! तेलोकरज्जंपि ॥९३९।। भासुरसरीरभूसण-पहापरिक्खेवरंजियदियंता । रायपत्तीए देवी पच्चक्खं तत्थ सच्चविया ।।९४०।। दठूण ससंभंता कुणइ पणामं पुणो इमं भणइ । कुलनहयलहरिणकं देहि सुयं देवि ! धूयं च ॥९४१।। उभयं पि तुज्झ होही असंसयं जिण-गुरुप्पंसाएण । इय भणिऊणं देवी तिरोहिया विज्जुलइय व्व ॥९४२।। विजयवई वि य असरिस-संतोसविसेसजायघणपुलया । काऊण जिण-गुरूणं पूय-पणामं गया भवणं ॥९४३।। नियभत्तुणो वि सव्वं जहट्ठियं साहियं च तेणावि । भणियं देवि ! असेसं जिण-गुरुपूयाफलं एयं ॥९४४।। ता देवि ! अविसंता तद्दिट्ठफला करेसु भत्तीए । पूयाइसु सविसेसं समुज्जमं सग्ग-सिवहेउं ॥९४५।।
Jain Education International
For Private & Personal Use Only
www.jainelibrary.org
