________________
७९
सिरिभुयणसुंदरीकहा ॥
किंकरकरग्गसंट्ठिय-महरिहपूओवगरणपडलेहिं । ‘सर ओसर'त्ति जंपिर-पडिहारेहिं व्व परियरिया ॥८४७।। जा जाइ पुरो तुरियं ता पेच्छइ जिणहरं परमरम्मं । गोउरदारपरिट्ठिय-बहुमालायारसंकिन्नं ।।८४८।। नीणंत-विसंताणं संघट्टघडंतथोरथणयाण । जुयईण हारलइया-गलंतमोत्ताहलाइन्नं ।।८४९।। जालंतरविवरवसा बहुविहमिव जत्थ धूवघणवडलं । जिणदसणखंडियभव्वलोयपावं व नीहरइ ॥८५०।।
अंतोपविट्ठसावय-जिणवंदणजाय-अफुडघोसमिसा । हुंकारिऊण दूरा खिवइव्व कुतित्थगहमोहं ॥८५१।। सहयारसोणपल्लव-तोरणसोहंतसुंदरदुवारं । नहूं नियइ व्व पुणो कोवारुणलोयणेहिं तमं ।।८५२।। पुफ(प्फ)पगरच्छलेणं वणस्सइजोणिवासभीएहिं । लुढमाणेहिं व पुरओ जिणस्स कुसुमेहिं सोहंतं ||८५३।। पुरओ अखंडदीवय-परंपरापयडमंडवपएसं । बहुजोइगणेहिं व जं सेविज्जंतं फुरंतेहिं ।।८५४॥ एवंविहम्मि जिणवर-हरम्मि पविसिय पसंतवावारा । पूयइ चंदप्पहपाय-पंकयं परमभत्तीए ।।८५५।। कयकुसुमपत्तपूओ मणिभूसणसोणकिरणकब्बुरिओ । घणकुसुमदुमंतरिओ सहइ जिणो अहिणवससिव्व ॥८५६।। निग्गंथस्स वि परमेसरस्स पासे सुपरिनिहित्ताई । वत्थाई तीए बहुगुण-सुभत्तिपडलाइ व सहति ||८५७।।
Jain Education International
For Private & Personal Use Only
www.jainelibrary.org
