________________
७३
सिरिभुयणसुंदरीकहा ॥
नरनाह! निययगरुयत्तणस्स अणुसरिसमभिहियं तुमए । गुरु-देवनयाण जओ नराण गरुयत्तणं होइ ||७८१॥ परमिह न अम्ह दोसो दोसो तुह चेव एस सव्वो वि । जेण असाहारणगुण-गणेक्कंठाणं कओ अप्पा ||७८२ ।। पूइज्जति गुणा खलु पुरिसेसु परिट्ठिया गुणिजणेहिं । गुणबहुमाणो वि कहं पयडिज्जइ इहरहा ताण ।।७८३॥ सामन्ने वि हु अब्भागयम्मि गौरवमवस्स कायव्वं । किं पुण नीसामन्ने तुमम्मि नरनाह ! न हु जुत्तं ? ||७८४।। राय त्ति गुरुगुणि त्ति य जयोवयारि त्ति सव्वगरुओ त्ति । अत्ति(ति)हि त्ति सव्वविहिणा नरिंद ! पुज्जो तुमं चेव।।७८५।। कमपरिवालियवसुहा-सुहसाहियसयलधम्मकम्माण । सव्वासमाण राया गुरुव्व परिपूणिज्जो त्ति ।।७८६॥ इय भणिए कुलवइणा सहस त्ति नरेसरेण पुण भणियं । जुत्तमजुत्तं व इहं कज्जं गुरु(र)वो वियाणंति ।।७८७।। एक्केण तओ सहसा तावसथेरेण कुलवई भणिओ । पेसिज्जउ नरनाहो वीसमउ सुहेण आवासं ॥७८८।। एवं ति तओ गुरुणा हियए परिभाविऊण पुण भणियं । वच्छे चंदसिरि ! सयं कुणसु नरिंदस्स करणीयं ।।७८९।। तयणंतरं च भावन्नु-बडुयसमुदायसंजुओ राया । आवासं कुलवइणा सप्पणयं पेसिओ य गओ ।।७९०॥ पत्तो चउकृथिरचच्चि(वत्थि)यम्मि घणपुप्फपयरपवरम्मि । परियप्पियसेज्जसुहासणम्मि एवम्मि उडवय(उडय)म्मि ॥७९१॥
Jain Education International
For Private & Personal Use Only
www.jainelibrary.org
