________________
७२५
सिरिभुयणसुंदरीकहा ॥
पुव्वुत्तकारणेहिं चिररूढपणट्ठसयलमालिन्नं । कह मज्झ मणं वहिही मालिन्नं तुम्ह विसयंमि ? ||७९४७।। रक्खंति इहरहा वि हु रज्जं कोसं बलं सरीरं च । तुम्ह पहावा, सेन्ने कह अम्हं होउ अवसेरी ? ||७९४८।। पडिकूलमाणसकयं सोक्खं दोक्खं व होइ माणीण । अणुकूलिमाए विहियं दुहं पि सोक्खं व परिणमइ ॥७९४९।। हिययविसुद्धि च्चिय सज्जणाण संतं पि चित्तमालिन्नं ।
ओसारइ मलिणजले मलं निहित्तं व कतकफलं ||७९५०।। परिणामसुहं कज्जं पमुहदुहं ओसहं व बालाण । उप्पायइ मणदुक्खं न उणो परमत्थदंसीण' ।।७९५१।। तो भणइ जक्खराया 'हरिविकूम ! अवितहं तए भणियं । एयारिसो विवेओ कह होही इयरपुरिसाण ? ||७९५२।। पभणामि किंपि निसुणसु एगमणो रायपुत्त ! मह वयणं । परिभाविऊण पच्छा जहोचियं अणुचरेज्जासु ॥७९५३।। एसा असेसनरवइसिरिमोडनिधिचरणवीढस्स । एक्कंगपसाहियचउसमुद्दवसुहेक्कनाहस्स ।।७९५४।। पसरंतपयावानलपुलट्ठरिउकाणणस्स वीरस्स । सिरिचंदसिरीसुहगब्भसंभवा कन्नया जाया ॥७९५५।। नीसेसभुयणसुंदेरविजियतियसंगणा कहं अहवा । वन्निज्जइ तुह पुरओ जा जाया नवर पच्चक्खा ।।७९५६।। हरिविकम ! एयाए नामं सिरिभुवणसुंदरी एसा । धूया देहो हिययं अहवा मह जीवियव्वं वा ।।७९५७।।
Jain Education International
For Private & Personal Use Only
www.jainelibrary.org
