________________
७१८
सिरिभुयणसुंदरीकहा ॥ ता पुत्त ! मज्झ वयणं नाणाविणिच्छइयभाविकल्लाणं । परिभाविऊण हियए अणुचिट्ठसु निव्वियप्पमणा ।।७८७०।। इह नाइदूरदेसे तवोवणं अत्थि तावसमुणीणं । तत्थत्थि बब्भुनामो मह मित्तो कुलवई पुत्त ! ॥७८७१।। तस्सासमंमि चिट्ठसु निययाणुट्ठाणपालणानिरया । तावसवेसा बहुविहतवसोसियकम्मसंघाया ।।७८७२।। इह संठियाए एही रायरिसी वीरसेणसूरी वि । होहिंति सुंदराई अन्नाइं वि एत्थ कज्जाइं ॥७८७३।। एत्थ समीवठियाणं अन्नोन्नं दसणाइं जायंति । एसा वि तुज्झ धूया दइयं पाविही जयदुलहं ।।७८७४।। तत्थेव अहं काहं भवणं मणि-रयण-फलिहनिम्मवियं । उज्जाणपरिक्खित्तं चंदप्पहपरमदेवस्स ।।७८७५।। तत्थच्छसु जिणपूयण-वंदण-संथुणणकम्मनिरयाओ । नीसेसकम्मनिट्ठवणकारणत्थं जयंतीओ' ||७८७६।। तो चंदसिरी सिरिवीरसेणसूरिस्स दंसणासाए । तं जक्खरायवयणं अकयवियप्पाणुमन्नेइ ॥७८७७।। तो सा पसत्थदियहे आपुच्छिय जक्ख-जक्खिणीलोयं । नीहरिया भवणाओ धूयाए समं च जक्खेण ||७८७८।। पत्ता तवोवणं सा पेच्छइ पुरओ जिणिंदवरभुयणं । उज्जाणवणं रम्मं वाविं पि विसट्टघणकमलं ॥७८७९।। तो परमभत्तिभरनिब्भरेहिं सव्वेहिं पूइओ देवो । अभिवंदिओ य विहिणा जहत्थथोत्तेहिं थुणिओ य ।।७८८०।।
Jain Education International
For Private & Personal Use Only
www.jainelibrary.org
