________________
सिरिभुयणसुंदरीकहा ॥
पत्ताइं तावसासममसमं दिट्ठो [य] कुलवई तत्थ । जक्खेण सायरं सा समप्पिया बब्भुनामस्स ॥ ७८८१ ॥ कुलवइणा तेणाऽवि य पडिवन्ना पभणिया य 'अच्छे । नियधम्मकम्मनिरया मज्झ समीवत्थउडवंमि' ||७८८२|| एवं सा चंदसिरी तसथावरजीवघायणे विरया । अणवज्जायरणपरा झाणज्झयणेहिं संपन्ना ||७८८३ ॥ गंतूण वंदइ जिणं तिकालसंझासु परमभत्तीए । सिरिवीरसेणसूरिस्स दंसणं निच्चमहिलसइ ||७८८४ ।। जं ताण तावसाणं ण्हाणनिमित्तं कढिज्जए सलिलं । तं पियइ फासूयं पायखालणं तेण य करेइ ||७८८५ ।। अप्पनिमित्तं तावसजणेहिं नीवारनिम्मियाहारो । परिपायफासुयाई कयलफलाईणि भक्खेज्जा || ७८८६ ।। अकओ अकारिओ अणणुमोइओ सव्वदो परिसुद्धो । सो आहारो तिस्सा सरीरठिइसाहणो होइ ॥ ७८८७ || एवं सा पइदियहं नियतणुनिरवेक्खचित्ततवचरणा । सुविसुद्धज्झवसाया परिसाडइ कम्मपडलाई ॥ ७८८८ ।। सा भुयणसुंदरी वि य तिकालसंझासु जक्खभवणाओ । आगंतुं पइदियहं पूयइ चंदप्पहं देवं ॥ ७८८९ ॥ संपूइऊण देवं पुणो वि सा जाइ जक्खभवणंमि । एवं अच्छंताणं माया - धूयाण जंति दिणा ।।७८९०।। जक्खो वि मलयमेहो अणुरूववरं गवेसमाणो य । सिरिभुयणसुंदरी परियडइ धरायलं सव्वं ॥ ७८९१।।
Jain Education International
For Private & Personal Use Only
७१९
www.jainelibrary.org
