________________
सिरिभुयणसुंदरीकहा ॥
तो गुरुवयणायण्णणववगयनीसेसदुक्खपब्भारा । पणमइ कमेण अकलंक-सूर-वीराइसाहूण ||७६१६।। तो अमरसेणराया विणयावणएण उत्तमंगेण । वंदइ पियामहं पियरमाइसाहूण संघायं ।।७६१७।। संबोहिऊण जणणिं समयं घेत्तूण पविसइ पुरीए । पियरपयट्ठियमग्गेण कुणइ रज्जं गुरुपयावो ।।७६१८।। एत्तो य सूर-वीरा मुणिचंदा सयलसाहुपरियरिया । अब्भसियसाहुकिरिया अहीयनीसेससुत्तत्था ।।७६१९।। अंतोहुत्तवियंभियअहियाहियभवसहावनिव्वेया । पवयणभणियकमेणं चरंति घोरं तवच्चरणं ॥७६२०।। छट्टट्ठम-दसम-दुवालसेहिं मास-द्धमासखवणेहिं । परिसोसियंगलट्ठी चम्मट्ठी-प्रहारुमेत्ततणू ॥७६२१।। एगविहसंजमरया दुविहपरिचत्तबंधणा सम्मं । निच्छिन्नतिविहदंडा निग्गहियचउक्कसाया य ।।७६२२।। पंचमहव्वयदुद्धरभारधरा पंचसमियसंजुत्ता । रक्खियच्छविह(छव्विह)जीवा सत्तभयट्ठाणप(पा)मुक्का ।।७६२३।। निहयट्ठमयट्ठाणा विसुद्धनवबंभगुत्तिसंजुत्ता । दसविहधम्मसमेया इयमाइअणंतगुणजुत्ता ।।७६२४।। किं बहुणा ? अट्ठारससीलंगसहस्सभारधुरधवला । सव्वत्थ अपडिबद्धा समतण-मणि-कंचणसहावा ।।७६२५।। गिम्हमि दिणद्धे उद्धजाणुणो झलजलंतसव्वंगा । अणिमिसनयणनियच्छियसूरा आयावणं लेंति ।।७६२६।।
Jain Education International
For Private & Personal Use Only
www.jainelibrary.org
