________________
६९३
सिरिभुयणसुंदरीकहा ॥
इय तिहुयणे वि सयले तुम्हे च्चिय राय! पुत्त(न्न)संपन्ना । तुम्हे च्चिय लद्धं माणुसस्स जम्मस्स फलमतुलं ।।७५९४।। ता मा कुणह विलंबं अहासुहं होउ कज्जसंसिद्धी' । इय भणिए सुहगुरुणा सव्वे वि अब्भुट्ठिया समयं ।।७५९५।। सुहपरिणामविसुझंतहिययनिद्दड्ढकम्मसंघाया । सुरगिरिगुरुदिक्खाभरहरिसोड्डियपीणखधंसा ॥७५९६।। आसन्नमहातवलच्छिसंगमुल्लसियपुलयपब्भारा । तव्वेलुग्गयपहरिसविसेसपफु(प्फुल्लमुहकमला ।।७५९७।। उत्तारंत्ति सहेलं हारंगय-कडय-कुंडलाईयं । पंचंगेसु य संसारपासबंधं वराहरणं ॥७५९८॥ कयपंचमुट्ठिलोया जहाविहं आगमाणुसारेण । पव्वाविया कमेणं गुरुणा अकलंककेवलिणा ॥७५९९।। तह सेहरयासोया विचित्तजसनरवई समंती य । मित्तो य बंधुयत्तो रायाणो मंति-सामंता ।।७६००।। सव्वेसिं मिलियाणं हंति सहस्सा दसद्धसीसाण । इय परिवारसमेया पव्वइया सूर-वीरमुणी ॥७६०१।। देवी सिंगारवई विजयवई तह य चंदसिरी देवी । सेहरयासोयाणं देवीओ सव्वपरिवारा ॥७६०२।। ढुक्काओ वयनिमित्तं गुरुणा पव्वावियाओ सव्वाओ । चंदसिरी पुण भणिया ‘वच्छे! मा कुणसु मणक्खे(खे)यं ।।७६०३।। एण्हि न होसि जोगा(ग्गा) वयस्स संजायगब्भभावेण । कालंतरेण होही पव्वज्जाजोग्गया तुज्झ' ||७६०४।।
Jain Education International
For Private & Personal Use Only
www.jainelibrary.org
