________________
६९२
सिरिभुयणसुंदरीकहा ॥ जय संसारमहाडविभमंतजणकहियमोक्खसुहपंथ ! । जय परमत्थुब्भासणकेवलवरनाणसंपन्न ! ।।७५८३।। जय नियदसण-जलहरपक्खालियसयलपावमलपंक ! । जय सम्मइंसण-नाण-चरणकयमोक्खवरमग्ग ! ॥७५८४।। जय तिहुयणबंधव! जय मुणिंद! जय सांमि जयहि परमप्प ! । अब्भुद्धर अम्हे देव! विमलचारित्तदाणेण ॥७५८५।। तुह वयणामयसवणुल्लसंतनिम्मलविवेयतेयस्स । संसारो संजाओ उव्वेवयरो महच्चत्थं ।।७५८६।। नाणाविहसप्पसहस्ससंकुलं मंदिरं व अम्हेहिं । जह नाह! परिचइज्जइ अवायबहुलो भवो तह य ।।७५८७।। तो परमेसर! परमं काऊण पसायमम्ह कुणसु दयं । जइ अत्थि जोग्गया णे ता दिक्खं देसु भवमहणं' ।।७५८८।। इय वीरसेणवयणं सोउं अकलंककेवली भणइ । 'को अन्नो दिक्खाए जोग्गो नरनाह! तुम्ह विणा ? ||७५८९।। दुहरूवो संसारो कहियव्वो तुम्ह जो पबोहत्थं । सो मुणिओ तुम्हेहिं अओ परं किं पि जंपेमो ||७५९०।। तप्पडिघायनिमित्तं पव्वज्जा समुच्चिय त्ति भणिहामो । तत्थ पयट्टो सि सयं उवएसो निरवयासो मे ।।७५९१।। उवएससहस्सेहिं वि के वि न बुझंति कसिणघणकम्मा । अन्ने निमित्तमासज्ज किं पि बुझंति तुम्ह व्व ।।७५९२।। ता तुम्ह जहत्थाई सूरो वीरो त्ति दोन्नि नामाइं । एम्हि जायाइं भवारिनिग्गहे उज्जमंताण ||७५९३।।
Jain Education International
For Private & Personal Use Only
www.jainelibrary.org
