________________
६९१
सिरिभुयणसुंदरीकहा ॥
एएण जो चइज्जइ तिहुयणसारेण पुरिसरयणेण । मणचिंतियसंपज्जंतसयलसोक्खेण वीरेण ।।७५७२।। सो सहि! अवस्सविरसो संसारो होइ विरसअवसाणो । अम्हारिसाण वि मणे उप्पायइ परमनिव्वेयं' ।।७५७३॥ इय संसारासारयभावणजणजणियसुद्धपरिणामो । सलहिज्जंतो परमत्थपंडिएहिं च पुरिसेहिं ।।७५७४।। अन्नाण वि पुत्त-कलत्त-विसय-धण-धन्नमाइमूढाण । नियचिट्ठिएण तेण वि विहडावंतो महामोहं ।।७५७५।। भुयणे निदरिसणं पिव मग्गपयट्टावओ व्व लोयाण । पत्तो उज्जाणवणं वीरो सह जणणि-जणएहिं ।।७५७६।। नियनियसिवियाओ तओ सव्वे वि पवड्डमाणसुहभावा । अणुकूलसउणपसरियमणहरिसा तत्थ उत्तिन्ना ।।७५७७।। वच्चंति परमहरिसुल्लसंतरोमंचकंचुइज्जंता । अकलंक-निम्मलाणं पासंमि पक्खित्तकुसुमोहा ।।७५७८।। कयतिपयाहिणकिरिया धरणीविलुलंतकुंतलकलावा । पणमंति गुरुं भत्तीए तयणु पथुणंति य जहत्थं ॥७५७९।। 'जय अच्चुज्जलबहुविहमणग्घगुणरयणरोहणगिरिंद ! । जय भवसमुद्दनिवडंतदिन्नसद्धम्मबोहित्थ ! ॥७५८०।। जय निबिडमहामोहंधयारभुवणेक्कनिम्मलपईव ! । जय विसमकसायानलपलित्तजणसिसिरजलवाह ! ।।७५८१।। जय दंतचलिंदियतुरंगसंजमणसुदिट्ठघणरज्जु ! । जय मत्तमयणमयगलगलथल्लणकेसरिकिसोर ! ।।७५८२॥
Jain Education International
For Private & Personal Use Only
www.jainelibrary.org
