________________
सिरिभुयणसुंदरीकहा ॥ रेहइ दरारुणदलं कुसुमं नवकंचणारविडवस्स । अहरदलं पिव माहवसिरीए पीयं वसंतेण ।।७३६३।। दरदलियदरंतरनीहरंतमयरंदवासियदियंतं । फुल्लं सोहइ वियइल्लसंभवं परिमलमहग्घं ॥७३६४।। एयं नरिंद! नोमालियाए आमोयमिल(लि)यभमरोलं । कुसुमं नवपिंडाउद्धसुद्धवन्नं मणभिरामं ॥७३६५।। एकविमीसियरुप्पयसुवन्नरससरिसवन्नदलसोहं । एयं च लकुचतरुणो फुल्लं भण कं न मोहेइ ? ||७३६६।। एयं च देव! मचकुंदसंभवं दीहकेसरसडालं । आपिंगपीवरदलं कुसुमं गंधुद्धरं सहइ ||७३६७।। मणहरवन्नं पि हु कन्नियारकुसुमं न एइ भसलाली । रूवेण किं व कीरइ गुणेहिं छेया हरिजंति ।।७३६८।। अंतो घणकेसरभरदलंतदलसंपुडंतरपिसंगं । फुल्लं पुन्नागदुमस्स जणइ इंदिदिराणंदं ।।७३६९।। एए उण फलतरुणो पुरओ दीसंति देव! बहुभेया । जे नियनियपरियणफलनिहित्तमिव देंति अमयरसं ॥७३७०।। एला-लवंग-लवली-कक्कोली-कयलि-नालिकेरी य । दक्खामंडव-पिंडी-खज्जूरी-फणसमाईया ||७३७१।। पेच्छ नरनाह! पुरओ कीलारसपरवसो व्व पुरलोओ । अणुरायमओ व्व विसेसविविहकीलाहिं अहिरमइ ।।७३७२ ।। एसो को वि जुवाणो केयइपत्तंमि कुंकुमरसेण । लिहिऊण चाडुगाहं समप्पए निययदइयाए ||७३७३।।
Jain Education International
For Private & Personal Use Only
www.jainelibrary.org
