________________
सिरिभुयणसुंदरीकहा ॥
समतलकोमलतणमणभिरामवसुहायलंमि ते दो वि । अह जुज्झिउं पयत्ता निबद्धदढपरियरायारा ॥७२०२।। उब्भडबाहुप्फालणपडिरववित(त्त)त्थवणयरसमूहा । अइभीमभिउडिभाला जुझंति निजुज्झजुज्झेण ॥७२०३।। तो बंध-विबंधुब्भडढो(ठो?)क्कर-करघाय-कत्तरिसएहिं । पयडियबहुविन्नाणा जुझंति दुवे अहिनिविट्ठा ।७२०४॥ दीसंति निविडमुट्टिप्पहारदिढवज्जघायघुम्मंता । अन्नोन्ननिबिडदिढबंधपीडणुव्वमिररुहिरोहा ॥७२०५।। घोराभिघायजज्जरियदीहनीहरियरुहिररत्तंगा । पलयंतकालसंझारुणदेहा चंद-सूर व्व ।।७२०६।। एवं च ताण जुझंतयाण दुत्ताररन्नमज्झंमि । रणपरवसाण दी(दि)यहा वोलीणा सोलस कमेण ।।७२०७।। तो सोलसमे दियहे विन्नत्तो बंधुयत्तमित्तेण । वीरो 'केत्तियकालं इहच्छियव्वं रणरसेण ||७२०८।। इह कालविलंबेणं कज्जाइं पुरो नरिंद! सीयंति । ता संवर संगामं देव ! उवायंतरेणेह' ।।७२०९।। तो भणइ वीरसेणो ‘मित्त! महंतं जणेइ मह कोडुं । जुझंतो एस भडो विसेसजुझंमि अइकुसलो' ||७२१०।। एवं पभणंतेण य बद्धो सो गारुडेण बंधेण । सुदिढं च बंधिऊणं पक्खित्तो नियविमाणंमि ।।७२११।। आरूढो य विमाणं विहियअओज्झापुरीमणवियप्पो । पेच्छइ खणेण वीरो पुरि अओझं परमरम्मं ।।७२१२।।
13
Jain Education International
For Private & Personal Use Only
www.jainelibrary.org
