________________
६५६
सिरिभुयणसुंदरीकहा ॥ किं व कुणइ अवराह करी मयंदस्स जो तयं हंतुं । कुंभत्थलाओ कड्डइ मोत्तानियरं सहत्थेहिं ।।७१९१।। ता सव्वहा वि एयाओ हुंति नीईओ इयरलोयाण । तुम्हारिसाण चंपाहिराय ! एवं न नीईओ ।।७१९२।। ता खग्गपुरिस ! मग्गसु विणएण असिं इमाओ रायाओ । गरुया जायंति वसे विणएण न विक्कमाईहिं' ।।७१९३।। एवं ते भणिऊण खयरा सट्ठाणमुवगया सव्वे । खग्गनरेण य भणिओ नरनाहो रोसविवसेण ।।७१९४।। 'रे रे दुट्ठ ! दुरायार ! धिट्ठ ! निल्लज्ज ! चत्तमज्जाय ! । सव्वपयारेहिं मए मारेयव्वो तुमं अज्ज ।।७१९५।। चोरावराहदुट्ठा वीयं च चंपाहिवत्तकयदासो । तइयं अकज्जनिरओ दोसेहिं इमेहिं दुट्टा सि ।।७१९६।। ता किं च मणे चिंतसि? पाव! करे कुण करालकरवालं । नत्थि तुह अज्ज मोक्खो सयं मए हढनिरुद्धस्स' ।।७१९७।। चंपाहिवेण भणियं 'न तए सह जुज्झिउं मई मज्झ । एएण कारणेणं नीइविलंबो मए विहिओ ।।७१९८।। कहमन्नहा महायस ! नीईओ करंति इयरपुरिस व्व । नियजीवियमोलणं जे भुयणं घेत्तुमीहंति ।।७१९९।। नीइनिसिद्रा वि न वुज्झसे जया वि समजायमइमोहा । ता जुज्झिस्सं एहि अन्नमुवायं अपेच्छंता' ।।७२००।। तो भणइ खग्गपुरिसो ‘उत्तरसु महीए तत्थ जुज्झामो' । उत्तरइ वीरसेणो जुज्झरसुल्लसियरोमंचो ।।७२०१।।
Jain Education International
For Private & Personal Use Only
www.jainelibrary.org
