________________
६५०
सिरिभुयणसुंदरीकहा ॥ पेच्छंताणं ताणं खणेण असणीहुया मुणिणो । राया वि सपरिवारो समागओ राउलं निययं ।।७१२५।। तो सोहणंमि दिवसे पसत्थतिहि-करण-वार-लग्गमि । सिरिवीरसेणराया सबंधुयत्तो विमाणेण ||७१२६।। करकलियखग्गरयणो संमाणियराय-मंति-सामंतो । लद्धाणुमई सव्वाहिणंदिओ सुहमणुच्छाहो ।।७१२७।। अणुकूलपवणसउणो उप्पइओ नहयलंमि नरनाहो । आणयणत्थं चलिओ नियमाऊ-पिऊण वेगेण ||७१२८।। पवणपहल्लिरचलचलिरकिंकिणीजालमुहलियदियंतं । जयजयरवं व उच्चरइ रायपत्थाणसमयंमि ।।७१२९।। पवणुधु(छु)यधवलधयाभुयाहिं नच्चइ व जायसंतोसं । पुरओ भविस्सपिउ-माइदंसणुच्छवगुरुरसेण ॥७१३०॥ घरपंगणं व वसुहा जलनिहिणो सारणि व्व गंभीरा । जत्थ ठिएहिं दीसंति गिरिवरा गंडसेल व्व ।।७१३१।। जं विविहमहामणिकिरणजालसुरचावबंधरमणीयं । सुरवइविमाणसंकाए चयइ दूरं खयरलोओ ।।७१३२।। दक्खिणदिसि धावंतं जं दीसइ रक्खसेहिं सभएहिं । पुफ(प्फ)यविमाणगइरामभद्दआगमणसंकाए ।।७१३३।। तो भणइ बंधुयत्तो 'तुह पच्चासाए इह मए भमियं । हरिणेण व मायातण्हियाए नडिएण रनंमि ।।७१३४।। सो देव! एस जलही तुह दसणजायहरिसपडहत्थो । दूरुल्लासियकल्लोलवीइहत्थेहिं नच्चइ व ।।७१३५।।
Jain Education International
For Private & Personal Use Only
www.jainelibrary.org
