________________
__ सिरिभुयणसुंदरीकहा ॥
दीसइ विलाससिंगो सग्गो व मणोहरो महाराय! । अंतरियनहदियंतो जसो व्व तुह विविहसिहरेहिं ।।७१३६।। एसा सा रणभूमी जत्थ हओ पवणकेउखयरिंदो । दीसंति भडक्खंभा खयराणं जत्थ सयणकया ।।७१३७।। तं देव! इमं होही मज्झं जलहिस्स दुरवगाहस्स । जंमि हरिणेव तुमए सिरि व्व आयढि(ड्डि)या देवी ॥७१३८।। एसो देव! सुवेलो महागिरी जत्थ निवसए लंका । अज्ज वि नरिंद! दीसंति जत्थ रामस्स जयखंभा ।।७१३९।। लवणोयहिस्स मज्झे अंतरदीवाई देव! दीसंति । एयं च दक्खिणं वेजयंतनामं पुरो दारं ।।७१४०।। एसेस जिणमएण व भवो विमाणेण लंघिओ जलही । दीसइ जेण नरेसर! पुरओ परतीरवणराई' ।।७१४१।। इय ताण अन्नोन्नपएसकहणवावडमणाण दोहिं(ण्ह) पि । पत्तं झत्ति विमाणं धाईसंडं महादीवं ।।७१४२ ।। एत्थंतरंमि सहसा निययविमाणट्ठिएहिं दोहिं पि । दिट्ठो नहे पडतो छिन्नो सकिवाणभुयदंडो ।।७१४३॥ केऊरकोडिपडिलग्गरयण-मणिकिरणवद्धपरिवेसो । सफरो व्व सचक्को इव सहइ सपासो व्व सवणु व्व ।।७१४४।। तं दद्रूण पडतं सविम्हउत्ताणियच्छिवत्तेहिं । 'किं किं'ति ससंभंतेहिं तेहिं अवलोइओ बाहू ||७१४५।। गुरुवेयनियडनिवडंतवियडभुयदंडअग्गहत्थाओ । गहियं नराहिवइणा खग्गं नियवामहत्थेण ।।७१४६।।
Jain Education International
For Private & Personal Use Only
www.jainelibrary.org
