________________
६३४
सिरिभुयणसुंदरीकहा ॥ संपइ तुमं पमाणं' भणिउं तुण्हिक्कओ ठिओ दूओ । सीहरहो वि य राया पुण एवं भणिउमाढत्तो ।।६९४९।। ‘इह दूय! सयं चिय संघडंति पुव्वज्जिएहिं सुकएहिं ।। भज्जा विज्जा अत्थो नेहो तह दोक्ख-सोक्खाइं ।।६९५०।। तो को न मन्नइ इमं महिंदपालेण जोणिसंबंघं ? । किं तु न पेसेमि सुयं स च्चेय सयंवरा एउ' ।।६९५१ ।। तो भणइ पुणो दूओ ‘मा धरसु मणमि पुव्ववयराइं । तुहपुत्तभउब्भंतं भुयणं निदा(द्दा)इ न सुहेण ।।६९५२।। जाव न उएइ सूरो जयंमि ता चेव पसरइ तमहो । न तमो न य तेयस्सी उम्मीलइ संभवे तस्स' ॥६९५३।। इय एवमाइ बहुविहनाणादिद्वंत-हेउ-जुत्तीहिं । संबोहिऊण रायं मन्नावइ सव्वकज्जाइं ॥६९५४।। तो सोहणंमि दिवसे बहुसेन्नसमूहपरिगयं काउं । पट्ठवइ इंददत्तं वीवाहत्थंमि रायगिहे ।।६९५५।। अणवरयपयाणेहिं रायगिहं पुरिवरं च संपत्तो । नीसेसं नियसेन्नं मोत्तूण सदेससीमाए ॥६९५६।। तो कइवयतुरियतुरंगमेहिं गुरुवेयविंदनिवहेहिं । सुहडेहिं रहवरेहिं य परियरिओ विसइ रायगिहं ।।६९५७।। सोऊण तयागमणं महिंदपालो वि सव्वरिद्धीए । कयनयरगुरुपमोओ पवेसइ परमसोहाए ।।६९५८।। सीहरहो उण राया सुयविरहविसेसदुब्बलसरीरो । तं चेव मणे झायइ तव्विसयकहाहिं य रमेइ ।।६९५९।।
Jain Education International
For Private & Personal Use Only
www.jainelibrary.org
