________________
सिरिभुयणसुंदरीकहा ॥
६३३
किं वन्निज्जइ रयणायरस्स इह ? किं तु तस्स वि न जायं । पुरिसोत्तिमहिययत्थं व कोत्थुहाओ परं रयणं ।। ६९३८ || ता देव ! पलविएणं किं बहुणा एत्थ कज्जरहिएण ? | एएण सुएण तुमं सकयत्थो रिउअसज्झो य ।।६९३९ ।। ता देव! तुह सयासे महिंदपालेण पेसिओ अहयं । कज्जेण जेण तं पि य साहिज्जंतं निसामेहि ।।६९४०।। सयलंतेउरपमुहा विणयवई नाम भारिया तस्स । जीयं व परमइट्ठा महिंदपालस्स सुकुलीणा ||६९४१|| तीसे उयरुप्पन्ना महिंदलच्छित्ति कन्नया सगुणा । जिस्सा रूवं जायं उवमाणं देवलोयंमि ।।६९४२ ।। तीए कयाइ नरेसर ! इंददत्तस्स निम्मलगुणोहं । तद्देसागयबहुबंदिलोयवयणाउ किर निसुयं ।। ६९४३ || तो तद्दियहाओ च्चिय तग्गुणसवणेक्कबद्धचित्ता । मोत्तूण इंददत्तं न अन्नपुरिसो मणे ठाइ ।।६९४४ ।। चित्तंमि चित्तकम्मे कव्वपबंधंमि गुणिजणकहा अन्नेसु वि वावारेसु नायगो तीए तुह पुत्तो ॥ ६९४५ ॥ तो धूयामणभावं नाऊण सहीमुहेहिं विणयवई ।
।
विन्नवइ महाराय इंददत्तस्स दाणत्थे ||६९४६ ||
नरवइणा वि य भणियं 'ठाणे च्चिय देवि ! तीए अणुराओ । आरुहउ कप्पलइया भुवण ( णु) वयारंमि कप्पदुमे' ||६९४७।। तो देव! अहं आलोच्चिऊण सहमंति- बुद्धिमंतेहिं । धूयादाणनिमित्तं नरवइणा पेसिओ एत्थ ।।६९४८।।
Jain Education International
For Private & Personal Use Only
www.jainelibrary.org
