________________
सिरिभुयणसुंदरीकहा ॥
तो सुरलोए दोन्नि वि नियआउं भुंजिऊण अणुकमसो । चइऊण जंबुदीवे इहेव भरहे अओज्झाए ।।६९१६।। सीहरहो नामेणं राया तत्थासि विजियपडिवक्खो । तस्सासि पिया भज्जा तेलोकुसिरि त्ति नामेण ||६९१७।। ताण अन्नोन्नपवड्डियघणपेम्मपरव्वसाण दोहिं(दोण्ह)पि । विसयसुहासत्ताणं वच्चंति जहासुहं दियहा ।।६९१८।। तो अभयचंददेवो ईसाणाओ चुओ य उववन्नो । तेलोकूसिरीगब्भे सुहसुविणयसूइओ धन्नो ।।६९१९।। निसि पच्छिमंमि जामे पेच्छइ सा सुमिणयं जहा इंदो । नियहत्थेण . समप्पइ तेलोकूसिरीए फलमेगं ।।६९२०।। सा तक्खणे पवुद्धा साहइ दइयस्स सो वि वज्जरइ । 'सक्केण देवि! दिन्नो को वि सुरो तुह सुओ होही' ।।६९२१।। तो सा पसत्थदियहे पसत्थसुहलक्खणेहिं संजुत्तं । पुन्निमनिसि व्व चंदं संपुन्नं पसविया पुत्तं ।।६९२२।। तो सीहरहो राया वद्धावणयं करावइ पहिट्ठो । बहुदास-दासि-पुरजण-परियणपरिवड्डियाणंदं ।।६९२३ ।। तो अइगयंमि मासे सीहरहो विहियदेव-गुरुपूओ । पुत्तस्स कुणइ नामं पयडत्थं इंददत्तो त्ति ।।६९२४।। पइदिणपयपाणपरंपराहिं तह कह वि वड्डिओ जह सो । कप्पडुमो व्व जाओ जणस्स मणवंछियप्फलओ ।।६९२५।। अहिगयकलाकलावो विन्नायासेससत्थपरिवारो । विन्नाणगुणनिहाणं पत्तो सो जोव्वणारंभं ॥६९२६।।
Jain Education International
For Private & Personal Use Only
www.jainelibrary.org
