________________
६३०
सिरिभुयणसुंदरीकहा ॥ ओसूणसरीरत्तणपरिपोसियअवयवा कहेइ व्व । एयसरूवस्स य जोव्वणस्स नणु वासणा भिन्ना ।।६९०५।। सभयं समोयडता इमीए सुणया वरं ससंकमणा । अवहीरियनरयभया नीसंका न उण कापुरिसा ॥६९०६।। जस्स कए एयाए वि कयाई देहस्स विविहपावाइं । सो एत्थ लुलइ सा उण अन्नत्थ सुहासुहगईए ।।६९०७।।। देहस्स कए जीवो करेइ नाणाविहाई पावाइं । सो पुण पयइअसारो परिणइविरसो व्व एसो व्व ।।६९०८।। न कुणंति सुया न कुणंति बंधवा न य कलत्त-मित्ताइं । विहडंतस्स खणेणं परिताणं हयसरीरस्स ॥६९०९।। एएण सरीरेणं विहवेण य पयइविहडणपरेण । धम्मविणिओयणेणं दोहिं(ण्ह)वि साफल्लयं कुज्जा' ।।६९१०।। इय एवमभयचंदो चिंतंतो जाइ बाहिरुज्जाणे । पेच्छइ फासुयवसुहापरिट्ठियं मुणिवरं एगं ॥६९११ ।। तस्संते सोऊणं धम्मं तित्थयरभासियं परमं । पव्वइओ चइऊणं पुत्त-कलत्ताइ नीसेसं ।।६९१२ ।। तो सो दुक्करतवचरणखीणदेहो विरायसंपत्तो । उप्पन्नो मरिऊणं ईसाणे सुरवरो पवरो ॥६९१३।। जयसिरिदेवी वि तओ दइयविओएण जायसंवेगा । संतागणणिसमीवे पव्वइया कुणइ तवचरणं ।।६९१४।। सा वि तहा मरिऊणं ईसाणे चेव तुह वरविमाणे । संजाया पुण भज्जा चिरभवनेहाणुबंधेण ।।६९१५।।
Jain Education International
For Private & Personal Use Only
www.jainelibrary.org
