________________
सिरिभुयणसुंदरीकहा ॥
अवहीरिया तएऽहं आणीया एत्थ दुज्जणजणेहिं । ता नाह! कुण पसायं दंससु दीणाए अप्पाणं ।।६८५०।। जइ वि तुमं निन्नेहो तह वि तुमं चेव मज्झ इह सरणं । दूरंतरिए सूरे अवस्स संमीलए नलिणी' ॥६८५१।। इय एवमाइ विविहं कीय वि नारीए विलवियं सोउं । तेणाऽऽकरिसियहियओ परदुहदुहिओ गओ पुरओ ।।६८५२।। जा जाइ ताव पेच्छइ धवलहरं सत्तभूमियं धवलं । तिस्सा करुणपलावेहिं कलुसियप्पा पुरो चडिओ ॥६८५३।। तो सत्तमभूमीठियसेज्जाहररइयवियडपल्लंके । दिट्ठा सा वत्थंचलपच्छाइयवयणतामरसा ॥६८५४।। तो भणइ अभयचंदो ‘काऽसि तुमं ? कत्थ संतिया एत्थ ? । एगागिणी केणत्थं रोवसि ? मह कहसु सव्वं पि' ।।६८५५।। सा वि मणे इय चिंतइ ‘कहेत्थ मणुयाण संभवो होही ? | ता को एसो रक्खो ? भूओ वा अह पिसाओ वा ? ||६८५६।। ता होइ सुंदरं चिय जइ एसो खाइ मं महापावं' ।। इय चिंतिऊण जंपइ ‘रे रक्खस! भक्ख वेएण' ।।६८५७।। तो भणइ अभयचंदो ‘नाऽहं भूओ न रक्खस-पिसाओ । मणुओ म्हि वणिइजाई उज्जेणीकयनिवासो य ।।६८५८।। सिरिवद्धणाओ पढम कडाहदीवं समागओ तत्तो । इह रयणसिहे बहुवहणसंजुओ आगओ एण्हि' ।।६८५९।। उज्जेणिकयनिवासो त्ति वयणामयं सुहारसमयं व । सोऊण सा वि फेडइ मुहाओ वत्थंचलं सहसा ॥६८६०॥
૪૧
Jain Education International
For Private & Personal Use Only
www.jainelibrary.org
