________________
६२६
सिरिभुयणसुंदरीकहा ॥ पेच्छइ अच्छेरयभूयरूव-लावन्न-जोव्वणारंभं ।। सहस त्ति अभयचंद विहसंतमुही कुमुइणि व्व ॥६८६१।। तेण वि सा सच्चविया निज्जियसुरलोयरूवरमणीया । आणंदबाहजलभरियनयणसंजायपुलएण ॥६८६२।। ‘स च्चिय एसा गुणचंदराइणो जयसिरि त्ति जा धूया । इह कह वि देव्यपरिणामजोगओ आगया होही ॥६८६३।। अहवा-वि न तीए सजीवियाओ अइवल्लहाए रायस्स । होही कहेत्थ आगमणसंभवो दूरदीवंमि ।।६८६४।। अहवा किं बहुएहिं वि निच्छयरहिएहिं मणवियप्पेहिं ? । एसा पुच्छिज्जंती संदेहं मज्झ अवणेही' ।।६८६५।। तो भणइ अभयचंदो ‘मा भाहि जहत्थमेव मह कहसु' । तो जयसिरीए भणियं 'अहं पि उज्जेणिवत्थव्वा' ।।६८६६।। 'सो चेय इमो अन्नो व्व कोइ तस्साणुसरिससुसरीरो' । इय हरिस-विसायसमाउलाए मोणं पुणो विहियं ।।६८६७।। 'लज्जिज्जइ तस्स पुरो अवलंबियधिट्टिमेहिं भणिउं पि । पुरिसंतरेण उ समं जंपति न कुलपसूयाओ' ॥६८६८।। इयमाइबहुयमणउल्लसंतसंदिट्ठमणवियप्पाए । उभयपक्खेहिं तीए संवरिओ वयणविन्नासो ।।६८६९।। तो भणइ अभयचंदो 'अम्ह वहणाइं अज्ज रयणीए । वच्चिस्संति किसोयरि! ता चलसु नयामि उज्जेणिं' ।।६८७०।। पुण भणइ अभयचंदो ‘गुणचंदसुया न जयसिरी होसि ?' । सा भणइ ‘अत्थि एवं' पुण जंपइ अभयचंदो वि ।।६८७१।।
Jain Education International
For Private & Personal Use Only
www.jainelibrary.org
