________________
६०८
सिरिभुयणसुंदरीकहा ॥ जयसुंदरीए(इ) सहिओ वच्चइ तम्माउ-गुणसिरीगेहं । सेज्जाए सुहनिसन्नो नियधूयं भणिउमाढत्तो ॥६६६३।। 'कस्स पयच्छामि तुमं ? को वा तुह चित्तसंगओ राया ? । परिभाविऊण चित्ते मह साहसु पुत्ति ! वेगेण' ॥६६६४।। तो सा पिउवयणेणं लज्जावसअवणउत्तिमंगेणं ।। परिकड्डइ रेहाओ धरणीए सयं कररुहेहिं ॥६६६५॥ तो तं तहासरूवं लज्जाभरमंथरं निएऊण । नरनाहो पडिभणिओ धूयाकज्जे गुणसिरीए ॥६६६६।। 'अंतोहुत्तवियंभियविमलविवेयाओ जइ वि नरनाह ! । लज्जंति गुरूण पुरो तहा वि वोत्तुं कुलवहूओ ॥६६६७।। ता काऊण पसायं इमीए सव्वंगसुंदरीए (?) । किज्जउ सयंवरेण महापसाओ महाराय ! ॥६६६८।। तो नियपडिहासेणं सकीयमणवासणाणुसारेण । अप्परुईए सयत्थं सयंवरे वरउ वरमेसा' ॥६६६९।। तो नरवइणा सव्वं गुणसिरिवयणं 'तह'त्ति पडिवन्नं । कारावइ बहुनरवइसंमद्दसयंवरं राया ।।६६७०।। मिलिएसु रूव-जोव्वण-लावन्न-कलानिवासराएसु । सो कोइ नत्थि जो किर तिस्सा हिययं अवहरेइ ॥६६७१।। तो ते रायकुमारा जयसुंदरिमणपवेसमलहंता । नियनियठाणेसु गया जसवद्धणजणियआमरिसा ॥६६७२ ।। तो नरवइणा भणिया नियदइया गुणसिरी इमं वयणं । 'पेच्छ जयसुंदरीए विगोविओ रायमझंमि ॥६६७३।।
Jain Education International
For Private & Personal Use Only
www.jainelibrary.org
