________________
६०२
सिरिभुयणसुंदरीकहा ॥ पडिवन्नं तेण तहिं इयराओ तत्थ मंगलकुडीए । रयणीए छोढूणं दारंमि परिट्ठिओ सययं ॥६५९८।। जसवद्धणो वि राया विसज्जियत्थाणपरियणो होउं । विहरइ पच्छन्नंगो अंतेउरमज्झयारंमि ॥६५९९।। जोयइ जुत्ताजुत्तं नियभज्जाणं च चेट्ठियं मुणइ । गुणरायं पि परिक्खइ गुण-दोसविभागमुणणत्थं ॥६६००।। तो सो कमेण राया समागओ विजयमंदिरं गुत्तो । पेच्छइ सेज्जाए ठियं मयणवियाराउलं विजयं ।।६६०१।। तो तत्थ चेव निहुओ थक्को जसवद्धणो अलक्खंगो । 'किं एसा इह सुत्ता न गया किं मंगलकुडीए' ॥६६०२।। एत्थंतरंमि तीए मयणपराहीणमणवियप्पाए । संपेसिऊण दासिं गुणराओ सद्दिओ सगिहे ॥६६०३।। तो सो नीसंकमणो अपडुसरीर त्ति मन्नमाणो य । काऊण दाररक्खं संपत्तो तीए गेहमि ॥६६०४।। जोक्कारिऊण दूरं उवविठ्ठो कयकरंजलीबंधो । पभणइ ‘देहाएसं आहूओ केण कज्जेण ?' ॥६६०५।। तो तीए तक्खणुप्पन्नमयणवियाराए दीहमूससिउं । आमोडिऊण अंगं पयंपियं कामविवसाए ॥६६०६॥ जं सुविणे वि न पेच्छइ गुणराओ जं मणे न चिंतेइ । तं तीए तया भणियं विसिठ्ठजणलज्जणीयं जं ॥६६०७।। तो तं तिस्सा वयणं अयंडगुरुवज्जवडणदुव्विसहं । सोऊण विसुद्धप्पा गुणराओ भणिउमाढत्तो ॥६६०८।।
Jain Education International
For Private & Personal Use Only
www.jainelibrary.org
