________________
६०३
सिरिभुयणसुंदरीकहा ॥
'तुह देवि ! अत्थि विसमं किं पि सरीरस्स कारणं गरुयं । जेण पराहीणमणा झंखसि एवंविहाई पि ॥६६०९।। अंतोवियंभिउद्दामगरुयजरभरपरव्वसंगीए । तुह देवि ! अपयइत्थं उवट्ठियं किंपि दुसरूवं' ॥६६१०।। तो तीए पुण भणियं 'न किं पि झंखेमि किंतु पयइत्था । तुज्झाणुरायरत्ता संभोयमईए पत्थेमि' ।।६६११॥ भणियं गुणराएणं ‘हा ! हा ! मह देवि ! तुज्झ वयणेण । निसुएण वि गुरुदुक्खं अच्छउ दूरे अणुट्ठाणं ।।६६१२।। नियजीयसंसए वि हु न कुलीणो कुणइ दो अकज्जाइं । एक्कं परधणहरणं वीयं परनारिपरिभोयं ॥६६१३।। निम्मलविवेयनयणो जहत्थउवलद्धपुन्नपावंगो । कह तुच्छसुहनिमित्तं पडामि घोरंधनरएसु ? ||६६१४।। जह देवि ! दुगुंछणीए ममंमि तुह रायवासणा जाया । तह एयं पि दुकम्मं दुगुंछणीयं विसिट्ठाण ||६६१५।। दिन्नो गुरूहिं जो मह अणुव्वएसुं अभिग्गहो गरुओ । ताण कह देवि ! भंग करेमि सम्मं वियाणंतो ? ||६६१६।। कह वंचामि नरिंदं साहम्मियवच्छलंधवीससियं ? । कह जणणीओ भणिउं पच्छा भुंजामि तुब्भे वि ? ॥६६१७॥ कह देवि ! तुज्झ सुकुलुब्भवाए सुकुलीणरायपत्तीए । एवं जंपंतीए हा हा ! जीहा वि नो खलिया ?' ॥६६१८॥ इय एवमाइ सव्वं सोऊणं तस्स निठुरं वयणं । सा मलियमुहमयंका भणइ इमं जायवेलक्खा ॥६६१९।।
Jain Education International
For Private & Personal Use Only
www.jainelibrary.org
