________________
५९१
सिरिभुयणसुंदरीकहा ॥
दूराओ च्चिय दिट्ठा पहिढवयणेण रायराएण । देवा-सुर-नरपरिसामज्झगया दिव्ववरनाणी ॥६४७७॥ कमलोयरे निविट्ठा पयासियासेसभुयणपरमत्था । कोमलकमलग्गकराहयमोहतमा दिणयर व्व ॥६४७८ ।। सिरधरियधवलछत्ता सिद्धिवहूए व्व सणनिमित्तं । पच्चागयाए उवरिं सोहंति समुच्छ्यमणाए ॥६४७९।। अच्चुज्जलनाणपहा धवलियनीसेसपरिसवित्थारा । संविभयंत व्व जणे नाणं उवयारबुद्धीए ||६४८०।। उज्जलकवोलभित्तिसु चरणनहेसुं व बिंबियजणोहा । आसिर-चरणंगेसु वि संकंतासेसभुयण व्व ।।६४८१ ।। सुहधम्मदेसणानीहरंतसियदसणकिरिणवित्थारा । अंतोभरिउव्वरियं पयासयंता उवसमं व ।।६४८२ ।। इय ते पसंतरूवे दंसणनिट्ट्यपावपदभारे । भुयणत्तयस्स पुज्जे अणंतवरनाणसंपन्ने ||६४८३ ।। दठूण महाराओ हरिसवसुल्लसियबहलरोमंचो । सपरिग्गहोऽभिवंदइ संथुणई परमभत्तीए ॥६४८४।। 'नमह नमिरामरेसरकिरीडमणिकिरिणजालकब्बुरिए । दोसत्थमणपयासियसंझे व्व मुणिंदपयकमले ॥६४८५।। जेहिं पणामावसरे नहमणिसंकेतनियसरीरेहिं । अवलोइज्जइ अप्पा दुगे(ग्गे)ज्झा ते भवदुहाण ।।६४८६।। दसणमेत्तेण वि तुम्ह नाह ! विहडंति पावपडलाइं । कह संभवंति तिमिराइ देव ! दूरुग्गए सूरे ? ॥६४८७।।
Jain Education International
For Private & Personal Use Only
www.jainelibrary.org
