________________
५९२
सिरिभुयणसुंदरीकहा ॥ तुह पुव्वदंसणाओ समुवज्जियविमलपुन्नबंधेहिं । संपाडियं दुलभं पुणो वि मह दंसणं एण्हि' ॥६४८८॥ इय परमभत्तिवसनीहरंतसब्भूयगुणसमूहेहिं । थोऊण महाराओ पुणो पुणो पडइ पाएसु ॥६४८९॥ सुपमज्जिऊण वसुहं वरिल्लवत्थंचलेण उवविसइ ।। पुण केवलिणा उचियं नरनाहो भणिउमाढत्तो ।।६४९०।। 'नरनाह ! जत्थ तुम्हारिसा वि निम्मलविवेयरयणा वि । हीरंति दुरासाहिं को दोसो तत्थ इयराण ? ॥६४९१॥ जइ कह वि पुनपरिणइवसेण अणुकूलदेव्वजोएण । रज्जसिरी संपत्ता रंकेण व पोलियाखंडं ॥६४९२॥ ता किं तत्थेव तए विहियथिरासेण लंपडत्तणओ । अप्पा उवेक्खियव्वो भण अज्ज वि केत्तियं कालं ? ॥६४९३।। सुवियड्ढो वि हु परमत्थपंडिओ विइयभवसहावो वि । कह धुत्तकुट्टणीए व छलिज्जसे रायलच्छीए ॥६४९४।। नरनाह ! देवलोए बहुसागरदीहकालमाणेहिं । तित्तो न सुरसुहेहिं सो कह एएहिं तिप्पिहसि ? ॥६४९५॥ दारिद्दपरिहवकयं दुक्खं दठूण परभवे राय । जिणधम्मपहावेणं सुर-नररिद्धीओ लद्धाओ ॥६४९६।। जइ दिट्ठफलो तं चिय नरिंद ! धम्मं करेसि पडिपुन्नं । सासयसोक्खमणंतं एण्हि मोक्खं पि पावेसि’ ||६४९७।। तो भणइ वीरसेणो ‘भयवं ! दारिद्द-परिभवाईयं । कह मे दुक्खं जायं ? कह वा जिणधम्मसंपत्ती ? ॥६४९८।।
Jain Education International
For Private & Personal Use Only
www.jainelibrary.org
