________________
५९०
सिरिभुयणसुंदरीकहा ॥ तो नाऊण समत्थं पुत्तं सव्वेसु चेव कज्जेसु । सिरिवीरसेणराया अहिसिंचइ जोवरज्जंमि ।।६४६६।। एवं वच्चइ कालो संसारो सरइ जंति दियहा वि । भुंजइ अखलियरज्जं वीराहिवई महाराओ ।।६४६७।। अह अन्नया कयाई दोन्नि वि अकलंक-निम्मला मुणिणो । गयणंगणेण पत्ता चंपाए बाहिरुज्जाणे ।।६४६८।। तो नाऊण नरिंदो आगमणं ताण धम्मसूरीण ।। आणंदनिटभरो कहइ चंदसिरी-बंधुयत्ताण ।।६४६९।। 'जे तुम्ह मए कहिया पुट्विं मह धम्मदायगा गुरवो । अकलंक-निम्मला इह ते पत्ता मज्झ पुन्नेहिं' ।।६४७०।। तो ताई गुरुसमागमहरिसवसुल्लसियबहलपुलयाई । चइयासणाई समुहं सत्तट्ठ पयाइं गंतूण ॥६४७१ ।। परिछुट्टियकेसपासग्गपढमसुपमज्जियावणितलाई । वंदति गुरुं वसुहानिहित्तसिर-जाणु-हत्थाइं ॥६४७२।। तो पहाओ सुइभूओ हरियंदणकयविलेवणो राया । परिहियसव्वाहरणो पसत्थजयवारणारूढो ॥६४७३ ।। महया संमद्देणं असंखनरनाहसेन्नपरियरिओ । चंदसिरीसंजुत्तो असेसपुरिलोयपरिकिन्नो ॥६४७४।। सविचित्तजसो राया सबंधुयत्तो समंतिपरिवारो । चंपाए नीहरिओ अइगरुयमहापमोएण ।।६४७५ ।। संपत्तो य कमेणं महापमोयाभिहाणमुज्जाणं । ओयरइ करिंदाओ पत्तो गुरुपायमूलंमि ।।६४७६।।
Jain Education International
For Private & Personal Use Only
www.jainelibrary.org
