________________
सिरिभुयणसुंदरीकहा ॥
जुत्तं चिय विनवियं सेणाहिववैरसीहराएण । पहवामि पोरुसे जं देवायत्ते न उण कज्जे ॥४९८॥ इह पुरिसयारसज्झे कज्जे मंतीण पसरए मंतो । देवायत्ते उण ताण देव ! विहडंति बुद्धीओ ।।४९९॥ कज्जे ससत्तिसरिसे लहइ सलाहं नरो पयट्टतो । नियसत्तिअसज्झे उण मरणमकित्तिं च पावेइ ।।५००।। नियबलसज्झे वेरिम्मि विक्कमो फलइ देव नन्नत्थ । सीहस्स व घणवंद्रे उट्ठाणं होइ मरणाय ।।५०१।। ता देव ! जाव न सुरो अवयारं कुणइ किंपि तुह सेन्ने । ता एत्थ वैरसीहो आणिज्जउ नियसमीवम्मि ॥५०२॥ तो नरवइणा भणियं सच्चमिणं जंपियं तए मंति ! । एसो च्चिय मह हियए विप्फुरिओ अविहडो मंतो ।।५०३।। एत्यंतरे कुमारो पसन्न-गंभीर-महुरवयणेहिं । विन्नवइ महारायं मंतिं च पभासइ पहिठ्ठो ।।५०४।। “अनिउत्तेहिं न जुज्जइ गरुयाण पुरो सिसूहिं वोत्तुं पि । जणयंति सिरे सूलं 'अट्ठवियमहत्तरा जम्हा ।।५०५॥ तहवि नियचावलेणं तुह पायासंपि मा पभणिस्सं(?) । जं बालाओ गेज्झं सुहासियं बुद्धिमंतेहिं ।।५०६।। मा ताय ! मज्झ रूससु पियं भणंतस्स कडुयवयणेहिं । अविमंसियकज्जरया पुरिसा पावंति हलुयत्तं ।।५०७।। पुट्विं परिक्खिऊणं अहि-कंटगविरहियम्मि सुहमग्गे । मुक्को वि ठवइ पायं कयगम्मागम्मसंकप्पो ॥५०८॥ १. अस्थापितमहत्तराः ॥
Jain Education International
For Private & Personal Use Only
www.jainelibrary.org
